Jumys saparymen Japoniiaǵa barǵan Almaty qalasynyń ákimi Baýyrjan Baibek kúnshyǵys eliniń isker orta ókilderimen birqatar ekijaqty kezdesýler ótkizip, Tokio qalasynyń meri Iýriko Koike hanymmen júzdesti, dep habarlaidy "Ult aqparat" qalalyq ákimdiktiń baspasóz qyzmetine silteme jasai otyryp.
Taraptar investitsiialyq, saýda-ekonomikalyq salalar jáne qalany odan ári damytý boiynsha yntymaqtastyq máselelerin talqylady.
«Tokio meri Almatyda ótken dúniejúzilik qysqy Ýniversiadanyń joǵary deńgeiin erekshe atap ótti jáne Astanada bolatyn Halyqaralyq EXPO-2017 kórmesine tabys tiledi», - delingen habarlamada.
«Men Almatyda bolǵanmyn, qala maǵan erekshe unady. Sizdiń bul saparyńyz ózara yntymaqtastyqty odan ári nyǵaitýǵa jańa serpilis beredi degen oidamyn», - dep atap ótti Iu.Koike.
«Tokyo Seiko MFG» kompaniiasy basqarmasynyń tóraǵasy Shigeto Tanakamen bolǵan kezdesýde Alataý aýdanyndaǵy Indýstrialdy aimaqta ornalasqan «Tokyo Rope Almaty» metiz zaýytyn salý jónindegi jobanyń ekinshi kezegin júzege asyrý máseleleri talqylandy.
«Tokyo Rope» kompaniiasynyń Almatyda bolat ónimderin shyǵarýmen ainalysatyn alǵashqy japondyq zaýyty ótken jyldyń qarasha aiynda QR Prezidenti N. Á. Nazarbaevtyń qatysýymen ótken telekópir barysynda Japoniiadan iske qosylǵan edi.
Álemdik reitingte 10 úzdik bankter qataryna engen «The Bank of Tokyo-Mitsubishi UFG» basshylyǵymen kezdesý barysynda Baýyrjan Baibek Almatyda birikken jobalardy júzege asyrýǵa iri qarjy konglomeratynyń qoldaityndyǵyna senim bildirdi.
Jol qozǵalysyn basqaratyn Tokio Ortalyǵynda bolǵannan soń «Smart siti» jobasy aiasynda Almatynyń damý Ortalyǵy qala trafigin basqarýdyń osyǵan uqsas ortalyǵyn qurý úshin saraptamalyq esepteýler júrgizedi. Óz kezeginde «Almaty Sý» holdingi «YYS International Pte» kompaniiasymen birge sýdy tazartýdyń koagýliantty granýl júiesin júzege asyrady.
Qalalyq ákimdiktiń baspasóz qyzmetiniń habarlaýynsha, Almaty delegatsiiasy jumys sapary barysynda saýda, investitsiia, qyzmet kórsetý boiynsha álemdegi eń tanymal korporatsiialardyń biri «Mitsui&Co.» ofisinde boldy, sonymen qatar «Shimizu» seismologiialyq kompaniiasy zertteý ortalyǵynyń jumysymen tanysty.
