«Nur Otan» Tóraǵasynyń Birinshi orynbasary Baýyrjan Baibek partiianyń sailaýaldy baǵdarlamalarynyń Túrkistan oblysynda iske asyrylý barysymen tanysty, dep habarlaidy "Ult aqparat".
«Birneshe jyl buryn Elbasy, Tuńǵysh Prezident Nursultan Nazarbaevtyń Túrkistandy jańǵyrtý týraly qabyldaǵan sheshimi elimiz úshin ǵana emes, búkil túrki álemi úshin tarihi oqiǵa boldy. Qysqa merzim ishinde rýhaniiatymyzdyń dińgegi bolǵan kóne de qasietti qala qaita túledi», – dep atap ótti Baýyrjan Baibek.
Onyń aitýynsha, Memleket basshysy Qasym-Jomart Toqaev jariia etken «Ózgerister joly: Ár azamatqa laiyqty ómir!» Sailaýaldy baǵdarlama aiasynda 2025 jylǵa deiin óńirde kóptegen áleýmettik jáne mádeni jobalardy júzege asyrý josparlanýda.
Oblysta 5 jylǵa josparlanǵan 1956 is-sharanyń 20%-ten astamy oryndaldy. 364 myń sharshy metr turǵyn úi, 15 jańa mektep, 8 mádeni nysan salyndy. Jyl sońyna deiin 717 eldi meken sapaly aýyz sýǵa qol jetkizedi, sondai-aq óńirdiń taǵy 65 myń turǵyny tabiǵi gazben qamtamasyz etiledi.
2025 jylǵa deiin oblysta 66 densaýlyq saqtaý nysanynyń qurylysy josparlanyp otyr. Búgin Baýyrjan Baibek partiianyń sailaýaldy baǵdarlamasy aiasynda Túrkistanda salynǵan qalalyq ortalyq aýrýhanany aralady.
«Meditsina qyzmetkerlerimen birge densaýlyq saqtaý salasyndaǵy ózekti máseleler, onyń ishinde óńirlerde bilikti mamandardyń jetispeýshiligi máselesin talqyladyq. Bul máseleni sheshý úshin partiia naqty maqsattar qoiady. Atap aitqanda, balalar dárigerlerin qosa alǵanda, arnaýly salaǵa mamandanǵan meditsina qyzmetkerlerin daiarlaýǵa arnalǵan granttar sany artady. 2023 jylǵa qarai dárigerlerdiń jalaqysy 2,5 esege kóbeiip, keminde 550 myń teńgeni, orta meditsinalyq qyzmetkerlerdiń jalaqysy keminde 190 myń teńgeni quraidy. Tirek jáne seriktes aýyldarda feldsherlik-akýsherlik pýnktter men dárigerlik ambýlatoriialar ashylyp, jańǵyrtylady. Jalpy, barlyq kózderden densaýlyq saqtaýdy qarjylandyrý kólemi JIÓ-niń 5%-tine deiin jetkiziletin bolady», – dep jazdy ol Facebook-tegi paraqshasynda.
Sol kúni Baýyrjan Baibek gollivýdtyq «Disney» kinokompaniiasynyń memlekettik tilge dýbliajdalǵan «Jan» mýltfilminiń kópbalaly jáne az qamtylǵan otbasy balalaryna arnalǵan qaiyrymdylyq kórsetilimine bardy. Bul – «Bolashaq» baǵdarlamasy túlekteriniń joǵary halyqaralyq standarttar boiynsha aǵylshyn tilinen qazaq tiline dýbliajdaǵan 37 sheteldik kinokartinasynyń biri.
«Nur Otan» partiiasy Tóraǵasynyń Birinshi orynbasary atap ótkendei, «Baqytty otbasy» jobasy aiasynda partiia daryndy balalardy anyqtaý jáne qoldaý jumystaryn kúsheitedi, sporttyq sektsiialar men balalar úiirmeleri ashylady. Ómirlik qiyn jaǵdaiǵa tap bolǵan otbasylarǵa kómek kórsetý úshin búkil el boiynsha 234 arnaiy ortalyq ashylady.
Túrkistan oblysyna sapar barysynda Baýyrjan Baibek «Jastar-Otanga!» halyqaralyq jastar forýmynyń qatysýshylarymen de kezdesti.
