Almaty ákimdigi qala basshysy Baýyrjan Baibektiń AParking kompaniiasyna qatysy bar degen aqparatty joqqa shyǵardy, dep habarlaidy QazAqparat tilshisi.
Qala kóshelerindegi parkomattardyń betine japsyrylǵan plakattar kópshiliktiń talqylaýyna túrtki boldy. Bul qaǵazdarda belgisiz bireýler AParking turaq kompaniiasynyń qala ákimi Baýyrjan Baibekke tiesili ekendigin jazǵan.
Qala ákimdiginiń paiymdaýynsha, bul lozýngtar qaladaǵy kóleńkeli ainalymdy azaitýǵa qarsy tulǵalardyń isi bolýy múmkin.
«Almaty ákimdigi qala ákiminiń de, onyń otbasy músheleri men ózge de týysqandarynyń da Aparking kompaniiasynda úlesi joqtyǵyn resmi málimdeidi. Osyǵan bailanysty qala ákimdigi jalǵan jáne jala taǵý turǵysyndaǵy aqparatty taratý faktilerine quqyqtyq baǵa berý, sondai-aq onyń uiymdastyrýshylary men qatysýshylaryn jaýapqa tartý múmkindigin qarastyrý úshin quqyqqorǵaý organdaryna aryzdandy», - dedi ákimdikten.
