Onyń aitýynsha, el Prezidenti belgilegen júieli reformalarǵa keń aýqymdy qoǵamdyq-saiasi qoldaýdy qamtamasyz etý úshin búginde Nur Otan-da qajettiniń bári, iaǵni adamdar, tájiribe, resýrstar jáne infraqurylym bar.
«Nur Otan aldyna jańa kózqarastar men tásilderdi talap etetin múlde jańa mindetter qoiyldy. Sondyqtan men partiia tóraǵasy Qasym-Jomart Kemeluly Toqaevqa atqaryp otyrǵan qyzmetimnen bosatý týraly tiisti ótinish berdim. Búgin meniń ótinishim qanaǵattandyryldy», - dedi ol.
Baibek memlekettik jáne partiialyq qyzmette 20 jyldan astam eńbek etkenin: eki ret, jalpy alǵanda 6 jylǵa jýyq - Nur Otan tóraǵasynyń birinshi orynbasary, 3 jylǵa jýyq - Prezident Ákimshiligi basshysynyń orynbasary laýazymdarynda, 4 jyl Almaty qalasynyń ákimi bolyp jumys istegenin aitty.
«Qandai qyzmet atqarsam da, qai salaǵa jaýapty bolsam da, men árqashan Otanymyzdyń Táýelsizdigin nyǵaitýǵa, qoǵamda ishki saiasi turaqtylyq pen kelisimdi qamtamasyz etýge, el azamattarynyń ál-aýqatyn arttyrýǵa ózimniń úlesimdi qosýǵa tyrystym. Óz jumysymda ashyqtyq jáne jaýapkershilik qaǵidalaryn basshylyqqa aldym. Ar-namys, sózge beriktik jáne iske adaldyq degen uǵymdar men úshin árqashan birinshi orynda boldy», - dep jazdy Baibek.
Sondai-aq, ol Elbasy Nursultan Nazarbaevqa jáne Qasym-Jomart Toqaevqa alǵys aitty.
«Barlyq jumystardy atqarýda maǵan zor senim bildirgeni úshin Tuńǵysh Prezident - Elbasy Nursultan Ábishuly Nazarbaevqa úlken alǵys bildirgim keledi. Memleket basshysy, Nur Otan partiiasynyń tóraǵasy Qasym-Jomart Kemeluly Toqaevqa osy jyldary jan-jaqty qoldaý kórsetkeni úshin shynaiy alǵys aitamyn.
Partiia apparatynyń qyzmetkerlerine, sondai-aq ortalyqtaǵy jáne jergilikti jerlerdegi barlyq partiia múshelerine erekshe alǵys bildiremin. Olar - jaýapkershilikti óz moinyna alýdan qoryqpaityn isker jandar, Qazaqstannyń bolashaǵy úshin kún saiyn qajyrly eńbek etetin naǵyz patriottar. Sizdermen birge jumys isteý men úshin úlken mártebe boldy!» - dedi partiia tóraǵasynyń eks-orynbasary.
Baibek sózin qorytyndylai kele, el úshin taǵdyrsheshti kezeńde árbir azamat Memleket basshysynyń ainalasyna toptasyp, ony qoldaýǵa tiis ekenin aitty.
«Sóz sońynda aitarym, elimiz úshin osy taǵdyrsheshti kezeńde árbir azamat óziniń kózqarasy men senimine qaramastan Memleket basshysynyń ainalasyna toptasyp, Táýelsiz Qazaqstannyń gúldenýi men bizdiń balalarymyzdyń laiyqty bolashaǵy úshin mańyzdy áleýmettik-ekonomikalyq jáne saiasi reformalar baǵytyn qoldaýy tiis dep sanaimyn! Nur Otan bul jumysqa óz úlesin qosa alatynyna kámil senemin. Qiyndyqty eńserip, jeńiske birge jetemiz!», - dep qorytyndylady ol.
