"Nur Otan" partiiasy tóraǵasynyń birinshi orynbasary Baýyrjan Baibek Qazaqstan halqyn Naýryz meiramymen quttyqtady, dep habarlaidy "Ult aqparat".
"Ardaqty aǵaiyn! Ulystyń uly kúni – Áz-Naýryz qutty bolsyn!
Kógildir kóktemmen birge barsha dúnieni jańǵyrtyp-jasandyryp, tirshilikti túletip-túrlendirip kelgen Naýryz – barsha berekeniń bastaýy, yrystyń aldy, yntymaqtyń uiytqysy. Kún men tún teńelgen, barsha jurt baqqa kenelgen mamyrajai shaq. Sondyqtan da bul kúndi halqymyz bar merekeniń ulyǵy, igilikti istiń irisi sanap, Ulystyń uly kúni dep áspettegen. Ótkenge salaýat aityp, burynǵy ókpe-renishterin keshirisken. Keler kúnge úmitin jalǵap, joba-josparlaryn túzisken.
Barshaǵa belgili, elimiz úshin biylǵy jyl basy ońai bolmai tur. Álem jurtshylyǵyn sharpyǵan qaterli indet dúnieni dúrbeleńge salýda.
Osyǵan orai Elbasy bir ai buryn Qaýipsizdik Keńesiniń otyrysyn ótkizip, syn-qaterlerdiń aldyn alýǵa daiyn bolýdy qadap turyp tapsyrdy. Memleket basshysy Qasym-Jomart Toqaev ýaqtyly sheshim qabyldap, indettiń taralmaýy úshin tiisti saqtyq sharalaryn kúsheitti. Qazir bar jaǵdai memleket baqylaýynda, tiisti resýrstar jetkilikti.
Muqalmas jigeri men aýyzbirshiliginiń arqasynda halqymyz taǵdyrdyń talai qiyn-qystaý kezeńderi men syndarly sátterinen súrinbei ótkenin bilemiz. Judyryqtai jumylyp, birligimiz ben parasattylyǵymyzdy tanytsaq, bul ótkinshi qiyndyqty da eńseremiz.
Barshańyzdy osynaý bereke men birlik, teńdik pen keńdik, damý men órkendeý kúnimen quttyqtai otyryp, árbir shańyraqqa amandyq, sarqylmas qut-qazyna, mol yryzdyq tileimin.
Qabyrǵaly qalyń elimiz, aibyndy jurtymyz aman bolsyn. Jaratqan árdaiym jar bolyp, tótennen keler kesirden saqtasyn. Ulys oń, aq mol bolsyn!", - delingen quttyqtaýda.
