© Photo: Prezidenttiń baspasóz qyzmeti
Ázerbaijan Prezidenti Ilham Áliev Astanada ótip jatqan Túrki memleketteri uiymynyń sammitinde Qazaqstan Prezidenti men halqyna alǵysyn aitty, - dep habarlaidy Sputnik Qazaqstan.
Sammitte Áliev qaitarylǵan Qarabaq jerlerine toqtalyp, infraqurylymyn qalpyna keltirýge úles qosyp jatqan baýyrlas memleketterge óz alǵysyn jetkizdi.
"Men Qazaqstan Prezidenti Qasym-Jomart Toqaevqa kreativti ortalyq úshin alǵys aitamyn. Ony Qazaqstan bizge syiǵa tartty. Qazir ortalyq Fizýli qalasynda salynyp jatyr. Bunyń barlyǵy – bizdiń dostyǵymyz ben baýyrlastyǵymyzdyń aiqyn kórinisi", - dedi Áliev.
Al Ózbekstan Fizýli qalasyna mektep salyp berdi. Jańa nysan biyl tamyz aiynda ashyldy.
Onyń aitýynsha, qazirgi kezde ázerbaijandyqtar óz jerine birtindep qaityp jatyr. Ol jaqqa 2026 jylǵa deiin 140 myń adam kóship barady.
Aita keteri, Qazaqstan Fizýli qalasynda Qurmanǵazy atyndaǵy shyǵarmashylyq damý ortalyǵyn salyp beredi. Óner ortalyǵynyń jalpy aýdany – 3100 sharshy metr. Eki qabatty ǵimarat 600 adamǵa arnalǵan. Biyl qyrkúiek aiynda jańa nysannyń irgetasy qalanyp, 2023 jyldyń jeltoqsanynda paidalanýǵa beriledi.
Fizýli qalasyndaǵy Qurmanǵazy atyndaǵy shyǵarmashylyq ortalyǵy mýzyka jáne mýzykalyq aspaptar, zamanaýi tehnologiialar: jumys jabdyqtary, 3D modeldeý, veb-dizain, foto jáne video kýrstar baǵytynda jumys istemek. Sonymen qatar kilem toqýǵa, qolónerge, túrli sport pen horeografiiaǵa baýlityn synyptar ashylady.
