Atyraý, Mańǵystaý jáne Batys Qazaqstan oblystarynda bekire tuqymdas balyqtar zańsyz óndirýge qarsy «Bekire» jedel aldyn alý sharasy júrip jatyr, dep habarlaidy QazAqparat.
Atalǵan sharany 1 sáýirden bastap UQK Shekara qyzmeti, tabiǵatty qorǵaý prokýratýrasy, Kedendik baqylaý jáne balyq qorǵaý organdary birlesip ótkize bastady.
«Operatsiia bastalǵan ýaqyttan beri 269 quqyqbuzýshylyq anyqtaldy. Onyń ishinde zańsyz aýlaý, satyp alý jáne ótkizý, 24 balyq jáne balyq ónimderin tasymaldaý faktisi tirkeldi. Shara barysynda 241 quqyq buzýshy ustaldy. Olardan 18 tonna balyq, sonyń ishinde 4 tonnadan astam bekire tuqymdas balyqtar, 200 balyq aýlaý, onnan asa júzý quraldary tárkilendi», - dedi QR IIM resmi ókili Nurdildá Oraz ministrliktiń aptalyq brifinginde.
22 is boiynsha sotqa deiingi tergeý bastalǵan jáne 225 adam ákimshilik jazaǵa tartylyp, 10 millionǵa jýyq aiyppul salynǵan.
«Mysaly, Atyraý oblysynyń sý politsiiasy qyzmetkerleri oblys ortalyǵy turǵynynan 247 dana nemese zańsyz aýlanǵan bir tonnaǵa jýyq bekire tuqymdas balyq tárkiledi. Qazirgi ýaqytta ósimdikterdiń nemese janýarlardyń sirek kezdesetin jáne paidalanýǵa tyiym salynǵan túrlerin zańsyz paidalaný faktisi boiynsha sotqa deiingi tergep-tekserý júrgizilýde. Kúdikti ýaqytsha ustaý izoliatoryna qamaldy», - deidi N. Oraz.
