Batys Qazaqstan oblysyna «Pfizer» kompaniiasy óndirgen 29 250 doza «Komirnati» vaktsinasy jetkizildi. Bul týraly BQO densaýlyq saqtaý basqarmasy basshysynyń orynbasary Gúlnár Ábdirahmanova óńirlik kommýnikatsiialar qyzmeti alańynda ótken brifingide málim etti, dep habarlaidy QazAqparat.
Onyń aitýynsha, qazirgi kezde vaktsina emhanalarǵa taratylýda.
«Erteńnen bastap jasóspirimder, sondai-aq júkti jáne bala emizetin áielder egiledi. Bastapqyda 16-dan 18 jasqa deiingi jasóspirimder ekpe alady. Sodan keiin 15, 14, 13 jáne 12 jastaǵy balalarǵa kezek keledi», dedi Ábdirahmanova.
BQO sanitarlyq-epidemiologiialyq baqylaý departamenti basshysynyń orynbasary Nurlybek Mustaevtyń sózine qaraǵanda, óńirde osy ekpege qatysty oblys ákiminiń orynbasary tóraǵalyq etetin jumys toby quryldy. Onyń quramyna oblystyq sanitarlyq-epidemiologiialyq baqylaý departamenti, bilim jáne densaýlyq saqtaý basqarmalarynyń basshylary kirdi. Qazirgi kezde egiletin kontingent sany naqtylanýda.
