Batys Qazaqstandaǵy eldi mekender topan sýdyń astynda qalýy múmkin, dep habarlady KTK. Telearnanyń habarlaýynsha, Batys Qazaqstandaǵy eldi mekenderge sý basý qaýpi tónip tur.
Jýyrda túsken qalyń qar bylai tursyn, demalys kúnderi óńirde aýa raiy kúrt jylyp, jaýyn-shashyn bolady dep kútilýde. Osyǵan bailanysty Shaǵan, Derkól jáne Jaiyq ózenderi arnasynan asyp ketýi múmkin. Al tasqyn bola qalsa, on myńǵa jýyq turǵyn zardap shegeiin dep tur. Qazir jergilikti bilik ókilderi men qutqarýshylar apattyń aldyn alý úshin qoldan kelgenniń bárin jasaýda. Olar ózen muzyn oiyp, jurtqa qaýipsizdik sharalaryn barynsha túsindirip jatyr.
"Aleksandr Gapotchenko sý kóp jinalatyn myna aýmaqty jii baqylap júretinin aitady. Áitpegende mańaidaǵy erigen qar sýy osynda jinalyp, úlken kólge ainalýy múmkin deidi. Sonyń kesirinen bul aýmaqta ornalasqan úilerdi jylda sý basady eken. Muny aýdannyń kommýnalshylary jaqsy biledi", - dep habarlady telearna tilshisi.
Turǵyndar bolsa, biyl da úilerine sý kirip kete me dep alańdap otyr.
"Byltyr qardy ýaqytynda shyǵaryp, qaýiptiń aldyn aldy. Aldyńǵy jyly bul sharýany keshiktirgendikten mańaidaǵy sýdyń bári osynda jinalyp, myna jer kólge ainalǵan edi. Taǵy qaýiptenip otyrmyz", - dedi Oral qalasynyń turǵyny Aleksandr Gapotchenko.
Sý basý qaýpiniń baryn jergilikti atqaminerler de moiyndap otyr. Aitýlarynsha, qys ailarynda az jaýǵan qar naýryzda qalypty mólsherden kóp túsken. Kommýnaldyq qyzmet sol qardy áli tazalap biter emes. Al sinoptikter demalys kúnderi óńirde aýa raiynyń kúrt jylyp, jaýyn-shashyndy bolatynyn eskertýde. Sheneýnikterdiń qazir jantalasyp jatqany da sondyqtan.
"Kommýnaldyq mekemeler óziniń tehnikasymen jumys isteýde, biraq ol qazir jetkiliksiz bolyp tur. Sondyqtan biz jol jóndeitin mekemelerdiń jáne qurylysshylardyń tehnikasyn tarttyq. Al alys eldi-mekenderde sharýa qojalyqtardyń tehnikasyn da jumyldyrdyq. Sonda barlyǵymyz birge qazir osy naýryzǵa deiin tazalyp tastasaq, edáýir jeńildep qalady. Qaýip azaiady", - dedi Batys Qazaqstan oblysynyń ákimi Altai Kólginov.
Qutqarýshylar bolsa qazir kúsheitilgen tártipte jumys isteýde. Buryn muzdy jaryp tastaý ádisin qoldanǵan mamandar qazir ony arnaiy qurylǵymen oiyp jatyr. Óitkeni, jarý amaly qaýipti ári qorshaǵan ortaǵa ziiandy eken. Oral aýmaǵynda úsh birdei ózen arnasynyń baryn aita keteiik. Qutqarýshylar qazir ondaǵy qaýipti aýmaqtardyń bárin jiti baqylaýda.
"Muzdy kesip, olardy oiyp olardyń qalyńdyǵyn álsiretemiz. Qala boiynsha 19 orynda Shaǵan jáne Derkól ózenderinde, al sonymen qatar oblysta júrgizilip jatyr. Bul Tasqala, Zelenov jáne Aqjaiyq aýdandary", - dedi BQO TJD jedel qutqarý jasaǵynyń bas qutqarýshysy Aiagóz Qojanbaeva.
Boljamdarǵa qaraǵanda, biyl Jaiyq ózeniniń deńgeii byltyrǵa qaraǵanda 6 metrge joǵary bolady dep kútilýde. Tipti, keibir jerlerde 8,5 metrge deiin kóterilýi múmkin. Bul oblys ortalyǵy aýmaǵyndaǵy saiajailar men óńirdegi eldi mekenderdi sý basý qaýpi bar degen sóz. Sondyqtan qazirdiń ózinde jedel evakýatsiialaýǵa arnalǵan 28 oryn saqadai sai daiyn tur.
