Batys Qazaqstandaǵy aýyldardyń birinde eski úidiń astynan adamnyń súiegi tabyldy, dep jazady Sputniknews agenttigi jergilikti "Moi gorod" basylymyna silteme jasap.
Bórli aýdanyndaǵy Priýralnoe aýylynyń shetinde otyz jyldan beri zeinetker áiel turady. Birneshe jyl buryn sý tasqynynan keiin úidiń fýndamenti otyryp, jaryqtar paida bolady. Áieldiń ulynyń aitýynsha, sodan bastap úi janyndaǵy shuńqyrǵa bailanysty qorqynyshty túster mazasyn ketiripti. Sol kezde ol shuńqyrdy zerttep kóredi.
Belgili bolǵandai, úidiń astynda adamnyń boiyndai bólme bar eken, jerde birneshe adamnyń bassúiekteri tabylǵan. Jergilikti politsiia arheologtardy shaqyryp, bul jaittyń anyq-qanyǵyn bilmek bolady.
Tórt bassúiek Oral qalasyna saraptamaǵa jiberilgen, jaqynda aýylǵa professor, tarih ǵylymdarynyń doktory Murat Sydyqov baryp, jer astyndaǵy bólmeni tekseripti.
"Tabylǵan súiekter adamdiki. Shashylyp jatqan, jer astyndaǵy bólme keń, tonnelge uqsaidy. Biraq qazýǵa bolmaidy – jer opyrylyp, úiindi astynda qalý qaýpi bar. Muny oba dep aitýǵa áli ete, biraq júz nemese odan da kóp jyl buryn qazylǵan bolýy múmkin. Saraptama jasalǵannan keiin belgili bolady", — dedi arheolog.
Professordyń aitýynsha, bul jerdiń tarihi mańyzy zor ekeni dáleldense, arheologiialyq qazba jumystary júrgiziledi. Al eger súiekter Azamat soǵysy kezeńine nemese XIX ǵasyrǵa tiesili bolsa, qaita jerlenetin bolady.
