Batys Qazaqstan oblysynda sibir eligin atqan brakonerler ustaldy, dep habarlaidy "Ult aqparat".
BQO orman sharýashylyǵy jáne janýarlar dúniesi aýmaqtyq inspektsiiasynan túsken málimetke qaraǵanda, óńirde osyndai eki oqiǵa tirkeldi.
Inspektsiia qyzmetkerleri Aqjaiyq orman jáne janýarlar dúniesin qorǵaý jónindegi memlekettik mekemesiniń inspektorlary jáne Aqjaiyq politsiia bólimi qyzmetkerlerimen birlese júrgizgen reid barysynda Aqjaiyq aýdany Kónekketken aýyldyq okrýgi aýmaǵyndaǵy orman alqabynda zańsyz ań aýlaý deregin ashty. Tórt adamnan turatyn brakonerler toby qolǵa tústi. Oqiǵa ornynan oqtyń izderi bar eki sibir eliginiń ushasy, atylǵan 6 dana gilza, «IJ-43» markaly ańshy myltyǵy tárkilendi. Ustalǵandardan jaýap alyndy.
Atalǵan derek boiynsha QR QK 337-baby 3-bóligine (zańsyz aýlaý) sáikes tergeý amaldary júrgizilýde.
Taǵy bir osyǵan uqsas oqiǵa Báiterek aýdany aýmaǵynda boldy. Inspektsiia qyzmetkerleri men «Ohotzooprom» ÓB» RMQK Batys Qazaqstan filialy inspektorlary, sondai-aq BQO politsiia departamenti patrýldik politsiia batalony qyzmetkerlerimen birlesken shara barysynda Oral-Atyraý jolynyń 67-shaqyrymynda Býdarin memlekettik zooqoryǵynda zańsyz ań aýlady dep kúdikke ilingen tórt adam otyrǵan eki avtokólik ustaldy.
Oqiǵa ornynan tirkelgen 4 ańshy myltyǵy, oq-dáriler, balta, pyshaq, tros jáne jeke zattar tárkilendi. Joldan alys emes jerden polietilendi qapqa bólshektelip salynǵan janýar (aldyn ala joramal boiynsha sibir eliginiń) eti tabyldy.
Ony brakonerler qashqan kezde avtokólikten laqtyryp úlgergen. Avtokólikter Báiterek aýdany politsiia bóliminiń turaǵyna qoiyldy.
Bul derek boiynsha da QR QK 337-baby 1-bóligine sáikes tergeý júrgizilýde.
BQO politsiia departamentiniń baspasóz qyzmeti osy eki qylmystyq is boiynsha brakonerlerdiń anyqtalǵanyn jetkizdi.
Olardan eshqaida ketpeý jóninde qolhat alyndy. Qazirgi kezde saraptama taǵaiyndalyp, tergeý jalǵasýda.
