Batys Qazaqstan oblysynda shujyq tsehy órtendi, dep habarlaidy "Ult aqparat".
Oqiǵa búgin tańmen Báiterek aýdany Dariian aýylynda B.Momyshuly kóshesindegi «Kazak Akbars» JShS aýmaǵynda boldy.
Shujyq ónimderin óndiretin tsehtyń otqa oranǵany jóninde saǵat 06.37-de habar túsken. Tsehtyń tóbesi men ishindegi jabdyqtary janǵan. Órt 150 sharshy metrdi qamtydy. Ǵimarattyń jalpy aýmaǵy 2000 sharshy metr bolǵandyqtan, qosymsha kúsh shaqyryldy.
«Órtti sóndirýge barlyǵy 22 adam, 5 tehnika jumyldyryldy. «Tilsiz jaý» saǵat 09.53-te aýyzdyqtaldy. Zardap shekkender joq. Qazirgi kezde órttiń shyǵý sebebi anyqtalý ústinde», dedi QazAqparat tilshisine BQO TJ departamenti zilzalardyń qaýip-qaterin azaitý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldiev.
Onyń aitýynsha, óndiris oryndarynda órtke jol bermes úshin tehnikalyq sharalarmen birge órt qaýipsizdigin saqtaýǵa basa mán berý qajet. Ol úshin jumysshylardy oqytý, órt qaýipsizdigi talaptaryn múltiksiz oryndaý, kórneki úgit quraldaryn qoldaný syndy sharalardy júzege asyrý kerek.
