Batys Qazaqstan oblysynda saýda oryndarynda qanttyń jetkilikti qory bar, dep habarlaidy QazAqparat.
BQO kásipkerlik jáne indýstrialdy-innovatsiialyq damý basqarmasy málim etkenindei, 12-13 naýryz kúnderi negizgi bazarlar men saýda oryndaryndaǵy jaǵdaiǵa monitoring jasaý jáne azyq-túlik ónimderin kóterme ótkizýshilermen kelissóz jasaý barysynda ózge elder azamattary tarapynan taýar satyp alýǵa dúrligý baiqalǵan joq.
Sonymen qatar áleýmettik jelilerde Reseiden eksportqa tyiym salýǵa bailanysty qanttyń tapshylyǵy bolýy múmkin degen aqparat tarap ketti. Sonyń saldarynan Oral qalasyndaǵy jekelegen sýpermarketterde jergilikti turǵyndar arasynda qantty satyp alý 4 esege artty.
Sońǵy kúnderi qant baǵasynyń ósýi Reseiden Eýraziialyq ekonomikalyq odaq elderine astyq pen qantty eksporttaýǵa ýaqytsha tyiym salynýyna orai atalmysh ónimdi jetkizýshilerdiń kóterme baǵasynyń kóterilýine bailanysty.
Oblys ákimdigi qant baǵasyn turaqtandyrý maqsatynda qajetti sharalardy qabyldaýda. Másele jergilikti atqarýshy organdardyń baqylaýynda.
BQO statistika departamentiniń málimetine qaraǵanda, sońǵy aptada qanttyń ortasha bólshek saýda baǵasy 1,7 paiyzǵa artqan. Munyń negizgi sebebi dollar baǵamynyń ózgerýine bailanysty.
Sondai-aq qanttyń negizgi kólemi oblysqa Resei men Belarýstan jetkiziledi. Reseige salynǵan sanktsiia saldarynan atalǵan elderdegi birqatar iri zaýyttar kóterme saýdaǵa daiyn ónim shyǵarýdy jáne eksporttaýdy ýaqytsha doǵarǵan.
Qazirgi kezde Úkimet daǵdarysqa qarsy, sonyń ishinde óńirlerdiń importqa táýeldiligin tómendetý baǵytyndaǵy sharalardy qabyldaýda. Jergilikti jerde de tapshylyqqa jol bermeý jáne otandyq taýar óndirýshilermen qarym- qatynasty retteý maqsatynda jumystar júrgizilýde.
