Qazaqstan Táýelsizdiginiń 30 jyldyǵyna orai Batys Qazaqstan oblysynda dástúrli IV respýblikalyq Qadyr oqýlary márege jetti, dep habarlaidy "Ult aqparat".
Aqynnyń týǵan jeri Syrym aýdanynda osymen biyl tórtinshi ret uiymdastyrylyp, onlain túrinde ótken baiqaýǵa Nur-Sultan, Almaty, Shymkent qalalarynan, Almaty, Aqmola, Aqtóbe, Atyraý, Jambyl, Mańǵystaý, Qyzylorda, Qostanai, Soltústik Qazaqstan jáne Batys
Qazaqstan oblystarynan barlyǵy 42 oqýshy qatysty.
«Bolý úshin jaralǵam týǵan jerdiń jyraýy...» atty Qadyr Myrza Áli sózderine jazylǵan ánderdi oryndaýdan syrymdyq Ámina Orynbasar bas júldeni jeńip aldy. Oral qalasynan Symbat Ýrmanova birinshi, mańǵystaýlyq Aisáýle Turlyǵazy men qostanailyq Merei Bergenov ekinshi, soltústikqazaqstandyq Kámila Dinásh, aqtóbelik Janerke Ázimbek, qyzylordalyq Qaisar Qarabdinov úshinshi orynǵa ie boldy.
«Sózim barda – ózim bar» atty aqyn shyǵarmalaryn jatqa oqýdan Qaratóbe aýdany Úshaǵash negizgi orta bilim beretin mektebiniń oqýshysy Nuraina Syilybek úzdik shyqty.
Syrymdyq Aiasyl Sarqul birinshi, Almaty oblysynan Izbasar Izmuhan men mańǵystaýlyq Fariza Jeksenbai ekinshi, atyraýlyq Qaraqat Áljanova, aqtóbelik Gúlbaný Aldamjarova jáne elordalyq Eldos Pármeshov úshinshi dárejeli diplommen marapattaldy. Osy bólim boiynsha qatysqan soltústikqazaqstandyq Nazarqyz Álimjanqyzy Syrym aýdany ákiminiń arnaiy syilyǵyn aldy.
«Óleń jazdym toǵyz taraý, jeti órim» atty jas daryndardyń Qadyrǵa arnalǵan óz týyndylary boiynsha oraldyq Dilnaz Didarqyzy aldyna jan salmady. Sondai-aq elordalyq Mármár Dilshát birinshi, atyraýlyq Ernur Salaýatuly men qyzylordalyq Beknur Matyǵulov ekinshi, Almaty oblysynan Aiaýlym Kúndesh pen Toǵjan Jumatai, soltústikqazaqstandyq Gúlzat Qalymova, syrymdyq Dinara Talapova úshinshi satydan kórindi.
Respýblikalyq saiysqa tórelik etken qazylar alqasy J.Dosmuhamedov atyndaǵy mektep-balabaqsha kesheniniń aýlasyna aǵash kóshetterin otyrǵyzdy.
«Baiqaý Qadyr óleńderin jas jetkinshekterdiń súiip oqityndyǵyn taǵy bir kórsetti. Sózderine jazylǵan ánder de erekshe áser qaldyrdy. Aqyn shyǵarmalaryn respýblika
kóleminde keńinen nasihattaýǵa Qadyr atyndaǵy qor da belsene atsalysyp keledi. Budan bylai da osy baǵytta túrli is-sharalar uiymdastyrylatyn bolady», dedi QazAqparat
tilshisine belgili ánshi-kompozitor, Qazaqstannyń eńbek sińirgen qairatkeri, «Qurmet» ordeniniń iegeri, «Qadyr Myrza Áli» qoǵamdyq qorynyń direktory Donedil Qajymov.
