Batys Qazaqstan oblysynda koronavirýsqa shaldyqqan 421 adam infektsiialyq statsionarda jatyr, dep habarlaidy "Ult aqparat".
BQO densaýlyq saqtaý basqarmasy málim etkenindei, sonyń ishinde 136-sy oblystyq juqpaly aýrýlar aýrýhanasynda, 232-si qalalyq kópbeiindi aýrýhanada emdelýde.
Aýyr haldegi naýqastar sany – 57. Sonyń ishinde 16 adam jasandy tynys alý apparatyna qosylǵan. Pnevmoniiamen aýyrǵandar sany 273-ke jetti.
BQO taýarlar men kórsetiletin qyzmetterdiń sapasy men qaýipsizdigin baqylaý departamentinen túsken málimetke qaraǵanda, óńirde barlyǵy koronavirýs juqtyrǵan 1267 adam anyqtalsa, sonyń 835-i jazylyp shyqty.
Keshe oblysta 46 adamnyń syrqattanǵany belgili boldy (ósim – 3,8 paiyz). Munyń syrtynda klinikalyq aýrý belgileri joq 60 adam tirkeldi.
Qazirgi tańda sondai-aq 29 adam karantindik, 130 adam provizorlyq statsionarda jatsa, 719 adam úilerinde oqshaýlanǵan.
