Batys Qazaqstan oblysynda Pfizer vaktsinasymen egiletinderdiń tizimi jasaldy, dep habarlaidy QazAqparat.
BQO densaýlyq saqtaý basqarmasynyń basshysy mindetin atqarýshy Arman Qalibekovtiń óńirlik kommýnikatsiialar qyzmeti alańynda ótken brifingide málim etkenindei, atalǵan vaktsina óńirge jetkizilip, qoimaǵa túskennen keiin tiisti jumystar jasalatyn bolady.
Jospar boiynsha Pfizer vaktsinasymen birinshi kezekte júkti áielder men 12-18 jas aralyǵyndaǵy jasóspirimder egiledi. Balalardy vaktsinatsiialaý tek ata-ananyń tańdaýy boiynsha erikti túrde júrgiziledi.
A.Qalibekovtiń aitýynsha, kúni búginge deiin oblysta 242 752 adam vaktsinanyń birinshi komponentimen egildi. Bul – egilýge tiisti turǵyndardyń 58,6 paiyzy. Sonyń ishinde 174 708-i «Spýtnik V», 15 039-y QazVac, 24 974-i Hayat-Vax, 7 718-i Corona-Vac, 20 313-i Vero Cell vaktsinasyn qabyldady.
Sondai-aq 222 344 adam ekinshi komponentti aldy.
«Oblysta qoldanylǵan karantindik shekteý sharalary men vaktsinatsiia jaqsy nátije berip, koronavirýs juqtyrý kórsetkishiniń azaiyp, óńirdiń jasyl aimaqqa enýine septigin tigizdi», dedi A.Qalibekov.
Onyń sózine qaraǵanda, pandemiia bastalǵannan beri indet juqtyrǵan 39 323 naýqastyń 90 paiyzy (35 521) jazylyp shyqty. Barlyǵy 826, biyl 657 adam infektsiiadan kóz jumdy.
Qazirgi kezde oblys boiynsha 405 adam ambýlatorlyq em alýda. Oǵan qosa infektsiialyq statsionarlarda jatqan 136 naýqastyń 11-i aýyr halde. Asa aýyr haldegiler joq. Invazivti emes jasandy tynys alý apparatyna 8 patsient qosylǵan.
