Batys Qazaqstan oblysynyń juqpaly aýrýlar aýrýhanasynda 143 naýqas koronavirýstan emdelip jatyr. Bul týraly brifingte BQO densaýlyq saqtaý basqarmasynyń basshysy Bolatbek Qaiýpov málim etti, dep habarlaidy "Ult aqparat".
Onyń aitýynsha, sonyń 8-i – bala. 52 naýqas jeńil, 78-i ortasha halde.
«Qazirgi tańda jeti naýqastyń jaǵdaiy aýyr. Sonyń tórteýi jasandy tynys alý apparatyna qosylǵan», dedi B.Qaiýpov.
Sondai-aq 18 adam provizorlyq, 130 adam karantindik statsionarda jatyr.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń málim etkenindei, kúni búginge deiin óńirde 818 naýqas 262 oshaqta tirkeldi.
Solardyń 326-sy – syrttan kelgender (205-i – Reseiden, 119-y – Atyraýdan, bireýi – Germaniia, taǵy biri – Belarýstan).
Aýyrǵandardyń 54 paiyzy nemese 442-si – buryn aýyrǵandarmen qarym-qatynasta bolǵandar. Sonyń ishinde 106-sy – meditsina qyzmetkerleri.
Indettiń kópshiligi (633-i) Oralda tirkelgenimen, sonymen qatar oblys aýdandarynda da kóbeiip barady. Atap aitqanda, Aqjaiyq aýdanynda – 5, Bókei ordasynda – 2, Bórlide – 15, Jańaqalada – 4, Jánibekte – 11, Báiterekte – 34, Qaztalovta – 1, Qaratóbede – 2, Syrymda – 12, Tasqalada – 28, Terektide – 20, Shyńǵyrlaýda 2 adam syrqattanǵan.
«Qazirgi kezde Syrym aýdany Jympity, Tasqala aýdany Tasqala, Jánibek aýdany Qamysty jáne Borsy aýyldarynda karantin saqtalyp otyr. Sonymen aýrý anyqtalýyna bailanysty Qaratóbe aýdany Saraljyn aýyldyq okrýgi de jabylyp, blokposttar qoiyldy. Oblysta jaǵdai áli de qolaisyz bolyp otyr», dedi N.Mustaev.
Sonymen qatar oblysta 3 maýsymnan bastap klinikalyq belgileri joq 166 adam tirkeldi, olar úilerinde oqshaýlanyp, karantinde bolady.
