Batys Qazaqstan oblysynda kiik sanynyń ósýine bailanysty ony qorǵaý da qiyndap otyr, dep habarlaidy "Ult aqparat".
BQO orman sharýashylyǵy jáne janýarlar dúniesi aýmaqtyq inspektsiiasy basshysynyń orynbasary Zakariia Turalievtiń brifingide málim etkenindei, 2019 jylǵy áýe sanaǵy nátijesinde óńirdegi kiik sany 217 myńǵa jetken.
Biyl tótenshe jaǵdai men karantinge bailanysty áýe sanaǵy júrgizilgen joq. Degenmen mamandardyń topshylaýynsha, kiikterdiń sany 2-2,5 esege óskeni baiqalady.
Jaiyq kiik popýliatsiiasyna jatatyn aqbókender oblystyń Aqjaiyq, Qaztalov, Jánibek, Bókei ordasy, Jańaqala jáne Tasqala aýdandaryn mekendeidi. Ústirt tobyna jatatyn kiikter Syrym, Shyńǵyrlaý, Qaratóbe aýdandarynda azdap kezdesedi. Kiik únemi kóship-qonyp júretindikten, keide Reseidiń Saratov, Volgograd oblystary aýdandarynyń jerine de ótip ketip jatady.
Z.Turalievtiń sózine qaraǵanda, osylaisha kóship-qonyp júretin kiikterdi baqylaý da qiyn emes. Ár 15 kún saiyn aýysyp turatyn, 20 adamnan turatyn 4 inspektorlyq top 8 avtokólikpen bárin qamti almaidy. Kiikter 5 myńnan 20 myń basqa deiin toptalyp júredi. Al 100-200 bastan turatyn shaǵyn toptar qadaǵalaýsyz qalyp qoiady.
«Qazirgi tańda «Ohotzooprom» ÓB» RMQK-nyń oblystaǵy filialynda 53 qyzmetker bar, bul az. Sondyqtan inspektorlar sanyn kóbeitý jóninde Orman sharýashylyǵy jáne janýarlar dúniesi komiteti men atalǵan kásiporyn basshylyǵyna hat jiberildi. Sondai-aq «Bókeiorda» memlekettik rezervaty qurylsa, kiikti qorǵaý máselesin jeńildeter edi», - dedi Z.Turaliev.
Kiikterdi brakonerlerden qorǵaý máselesi de kún tártibinen túsken joq. Eger 2018 jyly – 43, ótken jyly 26 qylmystyq is qozǵalsa, biyl jyl basynan beri 18 qylmys ashyldy.
Quqyq buzýshylardan biyl 305 kiik ushasy men 1280 dana múiiz tárkilendi. Memleketke 1,3 mlrd astam shyǵyn keldi.
