Batys Qazaqstan oblysynda aýyl turǵyndary Qaztalov aýdanyn ekige bólip, Jalpaqtal aýdanyn oblys kartasyna qaitarýdy talap etti. Bul aýdan 25 jyl buryn aimaqtyq birlikterdiń birigýine bailanysty joiylǵan. Biraq jergilikti turǵyndar biliktiń bul sheshimimen áli kúnge deiin kelispei otyr.
Óńirlerdiń birikkenine shirek ǵasyr ótse de, jalpaqtaldyqtar Batys Qazaqstan oblysy biliginiń bul sheshimin áli de qate dep sanap, óz aýylyna aýdan ortalyǵy ataýyn qaitarýdy talap etip jatyr, dep habarlady Sputnik Qazaqstan agenttigi mgorod.kz saityna silteme jasap.
Barlyǵy 1997 jyly bastalǵan
Aýyl turǵyndarynyń aitýynsha, sol kezde áreket etken oblys ákimshiligi kúni búginge deiin belgisiz sebeptermen eki aýdandy, iaǵni Fýrmanov (qazirgi Jalpaqtal) jáne Qaztalov aýdandaryn biriktirý týraly sheshim qabyldaǵan. Fýrmanov eldi mekeni kólemi jaǵynan da, turǵyndarynyń sany jaǵynan da áldeqaida úlken bolsa da, Qaztalovty aýdan ortalyǵy etý týraly sheshim qabyldanǵan.
Mundai sheshim Qaztalov aýylyn damytý maqsatynda qabyldanǵan bolýy múmkin degen boljammen aýyl turǵyndary kelispeidi, olar sebep basqada ekenin aityp otyr. Ol kezde Qaztalovtan shyqqan Qabibolla Jaqypov Batys Qazaqstan oblysynyń basshysy bolǵan.
Biriktirilgennen keiin de aýyl turǵyndary kórshilerimen etene jaqyn aralasa qoimaǵan. Eldi mekender arasynda básekelestik áli de órship tur.
Memleket basshysyna hat
Úsh kún buryn qazirgi oblys basshysy Ǵali Esqaliev Jalpaqtalǵa jumys saparymen barǵan kezde jergilikti turǵyndar aýdandardy qaita bólý týraly másele qozǵady. Aqsaqaldar keńesiniń tóraǵasy Naǵym Rizýanov sheneýnikke aýyl turǵyndarynyń memleket basshysyna, úkimetke, oblys basshylyǵyna ashyq hat jazǵanyn aitty. Alaida bul másele kúni búginge deiin sheshimin tappai otyr.
Aqsaqaldardyń aitýynsha, aýdan mártebesinen aiyrylǵanǵa deiin, iaǵni 1997 jylǵa deiin Jalpaqtal gúldengen aýyl bolǵan. Turǵyndar jai anyqtama alý úshin Qaztalovqa barýǵa májbúr ekenin, al araqashyqtyq 60 kilometrden kem emes ekenin aityp shaǵymdandy.
Biraq óńir basshysy asyǵys málimdeme jasaýdan aýlaq bolýǵa shaqyryp, oblys nemese aýdandy bólý úshin ekonomikalyq jáne saiasi negiz bolýy kerek ekenin aitty.
"Men aýdandy bólýge saiasi negiz bar ekeni týraly prezident ákimshiligine usynys jiberemin. Biraq bul másele búgin-erteń sheshilmeidi. Óitkeni másele tek Qaztalov pen Jalpaqtalǵa qatysty emes. Osy sekildi máseleni taǵy eki aýdan turǵyndary kóterip otyr, al Qazaqstanda odan da kóp. Eger biz taǵy bir aýdan boiynsha sheshim qabyldasaq, basqa oblystar da bul máseleni kótere bastaidy. Men tek sizderdiń ótinishterińizdi tiisti organǵa jetkize alamyn. Ol úshin de negiz kerek, munymen Qaztalov, Aqjaiyq aýdandary men Báiterek aýdany boiynsha arnaiy qurylǵan komissiia ainalysady. Ol osy óńirler arasyndaǵy problemalardy, qolaisyzdyqtardy jáne ádiletsizdikterdi tekseredi", - dedi Ǵali Esqaliev.
Ol aýyl turǵyndarymen sóileskennen keiin Qaztalov aýdanynyń basshylyǵyna, bólim basshylaryna aptasyna bir ret Jalpaqtal eldi mekenine kelip, osynda jumys isteýdi tapsyrdy. Óńir basshysy mundai sheshim aýyl turǵyndarynyń memlekettik qyzmet alýlarynda qiyndyq týdyrmaýyna yqpal etýi kerek ekenin aitty.
Jalpy, Qaztalov aýdanyn ekige bólý týraly másele birinshi ret kóterilip otyrǵan joq. Mysaly, 2013 jyly osy jaǵdaiǵa narazy eki myńnan astam aýyl turǵyny aýyl ákimdigi aldyndaǵy alańǵa jinalǵan. Halyq negizinen Jalpaqtal eldi mekenin jeke ákimshilik birlikke bólý máselesin qarastyrýdy talap etti.
