Batys Qazaqstan oblysynda koronavirýspen kúres sharalaryna tartylǵan 1494 meditsina qyzmetkeri 192 mln teńge ústemeaqy aldy, dep habarlaidy "Ult aqparat".
BQO densaýlyq saqtaý basqarmasy ekonomikalyq josparlaý bóliminiń basshysy Asylbek Qanalievtiń aitýynsha, atalmysh shara QR Prezidenti Qasym-Jomart Toqaevtyń tapsyrmasyna sáikes júzege asyrylýda.
QR Densaýlyq saqtaý ministrliginiń biylǵy 4 sáýirdegi №KR-DSM 28/2020 buiryǵyna sáikes óńirde koronavirýs juqpasyna qarsy kúres sharalaryna tartylǵan meditsina
qyzmetkerlerin qarjylai qoldaýdy uiymdastyrý maqsatynda oblys ákiminiń orynbasary Bibigúl Qonysbaeva tóraǵalyq etetin komissiia qurylǵan bolatyn.
Atalǵan komissiia quramyna «Nur Otan» partiiasy, meditsina qyzmetkerleri kásipodaǵy, oblystyq jumyspen qamtýdy úilestirý jáne áleýmettik baǵdarlamalar basqarmasy, áleýmettik meditsinalyq saqtandyrý qory filialynyń ókilderi engizildi.
Komissiia sheshimimen naýryz aiy úshin meditsina qyzmetkerleriniń naqty atqarǵan ýaqyty úshin 22,7 mln teńge tólendi. Sonyń ishinde qaýiptiligine qarai birinshi
topqa kiretin 23 qyzmetker 2,2 mln teńge, ekinshi toptaǵy 101 qyzmetker 14,7 mln teńge, úshinshi sanattaǵy 91 qyzmetker 5,8 mln teńge aldy.
Óńirde koronavirýs alǵash ret 29 naýryz kúni tirkelgendikten, atalǵan buiryqqa sáikes juqpaly aýrýlar aýrýhanasy, provizorlyq jáne karantindik statsionar,
sondai-aq jedel járdem qyzmetkerleri men statsionarlarǵa naýqastardy tasymaldaǵan brigadalarǵa naqty atqarǵan ýaqyty úshin ústemeaqy belgilendi.
Sáýir aiy úshin 167,2 mln teńge, sonyń ishinde birinshi toptaǵy 95 qyzmetkerge 33,9 mln teńge, ekinshi toptaǵy 298 qyzmetker 58,5 mln, úshinshi toptaǵy 826 qyzmetker 74,8 mln teńge ústemeaqy aldy.
Sondai-aq naýryz aiy úshin qosymsha 2,5 mln teńge, sonyń ishinde ekinshi toptaǵy 26 qyzmetkerge 866 myń teńge, úshinshi toptaǵy 34 adamǵa 1183,5 myń teńge tólendi.
«Mamyr aiy úshin ústemeaqy tóleý máselesin komissiia maýsymnyń basynda bas qosyp, qarastyryp, sheshetin bolady», dedi QazAqparat tilshisine A.Qanaliev.
