Búgin Qarasai aýdanynda sáýleti qaitalanbas erekshe «Batyr babalar» memorialdy kesheniniń ashylýy ótti. Bul joba «Rýhani jańǵyrý» baǵdarlamasy aiasynda oblystyq ákimdik pen óńir metsenattarynyń birlesip atqarǵan jumysynyń jemisi. Osynaý ataýly kúnimen aýdan turǵyndaryn oblys ákimi arnaiy baryp quttyqtady.
Saltanatty sharanyń ashylýynda batyrlardyń erligin pash etetin teatrlandyrylǵan kórinis qoiyldy. Sodan keiin jinalǵandar aldynda oblys ákimi Amandyq Batalov sóz sóiledi.
- Barshańyzdy «Batyr babalar» memorialdy kesheniniń ashylýymen quttyqtaimyn. Bul biz úshin «Rýhani jańǵyrý» baǵdarlamasyn júzege asyrý aiasyndaǵy mańyzdy jobalardyń biri. Memleket basshysy Nursultan Ábishuly Nazarbaev atap ótkendei, el tarihyn, batyr babalarymyzdyń esimin jadymyzda ustaý erteńimiz úshin óte mańyzdy. Búgingi ashylyp otyrǵan memorialdy keshenniń jetisýlyq óskeleń urpaqty otansúigishtikke tárbieleýdegi alar orny erekshe bolatyndyǵyna senim bildiremin – dep, sózin aiaqtaǵan Amandyq Ǵabbasuly keshenniń saltanatty túrde lentasyn qiiý rásimine qatysty.
Sonymen qatar keshenniń ashylý saltanatynda metsenat, general-maior A.Shpekbaev, Qarasai aýdanynyń Qurmetti azamaty S.Jylqybaev pen Ýshinskii atyndaǵy orta mekteptiń 8 synyp oqýshysy Darhan Shafhatov óz quttyqtaýlaryn jetkizdi.
Belgili bolǵanyndai, memorialdy keshen ekspozitsiialary bir úlken zaldan jáne úsh taqyryptyq bólikten turady. Olar: «Saq dáýirinen Alash Orda úkimetiniń qurylýyna deiin», «Táýelsizdikke jetýge eleýli úles qosqan ataqty handar men biler», «Erligimen týǵan jerdiń dańqyn asqaqtatqan batyrlar», dep atalady.
Ekspozitsiiada keskilesken urystar men el taǵdyry qyl ústinde turǵan alma-ǵaiyp zamanda óziniń erligimen talai jaýdyń betin qaitaryp, ulan ǵaiyr atyrapty urpaǵyna saqtap qalǵan ataqty handar men biler, batyrlar men el táýelsizdigine úlesin qosqan adamdardyń portretteri beinelengen. Ekspozitsiianyń ortalyq tusynda batyr babalarǵa taǵzym kórsetýdi áspetteitin kompozitsiia beinelengen.
Esterińizge salar bolsaq, memorialdy keshenniń qurylysyn «Dáýlet Serpin 603» JShS merdiger qurylys mekemesi júrgizdi. Nysannyń ornalasqan jalpy jer aýmaǵy – 1,04 ga. Keshenniń ainalasyna dekorativti shyrshalar men kóshetter otyrǵyzylyp, tolyqtai abattandyrylǵan. Mýzei ǵimaraty oblys metsenattarynyń qarjysyna, al ishki ekspozitsiialarynyń qurylysy Almaty oblysy ákimdiginiń tapsyrysy boiynsha salyndy. Memorialdy keshendi kútip-ustaýǵa oblystyq mádeniet, arhivter jáne qujattama basqarmasy jaýapty dep bekitildi.
