Bastaýysh synyptyń oqýshylaryna «Quqyq negizderi» pánin engizgen jón be? Senatorlardyń bul usynysyna Asqar Mamin jaýap berdi, dep habarlaidy "Ult aqparat"
Aita ketsek buǵan deiin senatorlar qoǵamda bala quqyǵy jii buzylatynyn aita kele oqýshylardyń quqyq salasyndaǵy bilimin jetildirý bastamasyn kótergen bolatyn. Depýtattardyń aitýynsha mekteptegi jalpy bilim berý baǵdarlamasyna Adam quqyqtarynyń negizderi men olardy qorǵaý quraldary týraly praktikaǵa baǵyttalǵan pándi engizý múmkindigin qarastyrý kerek.
Bul suraqqa jaýap bergen Premer-Ministr jańartylǵan bilim berý mazmunynyń sheńberinde 9 synypta aptasyna 1 saǵattan, 10 jáne 11-synypta jaratylystaný-matematikalyq baǵytta 2 saǵattan, 10 jáne 11-synypta qoǵamdyq-gýmanitarlyq baǵytta 3 saǵattan, jaratylystaný-matematikalyq baǵytta 2 saǵattan, qoǵamdyq-gýmanitarlyq baǵytta 3 saǵattan jańa «Quqyq negizderi» páni engizilgenin málim etti. Odan bólek bastaýyshtar deńgeiinde «Dúnietaný» («Quqyqtar men mindetter»), «Ózin-ózi taný» pánderi, negizgi orta bilim deńgeiinde «Qazaqstan tarihy» páni oqytylady.
«Bul rette bilim berýdiń jańartylǵan mazmuny boiynsha baǵdarlamalyq material spiraldylyq qaǵidaty boiynsha zerdelenedi. Iaǵni quqyq máseleleri boiynsha negizgi taqyryptar jas erekshelikterin eskere otyryp, neǵurlym kúrdeli deńgeide qaitalanady. Oqý protsesinde oqýshylar jeke adamnyń quqyqtaryna, bostandyqtaryna, mindetterine qurmetti, óz pozitsiialaryn qorǵai bilýdi, demokratiialyq quqyqtardy durys paidalanýdy, qoǵam aldyndaǵy jaýapkershilikti sezinýdi, zańdylyqty qorǵaýǵa degen qajettilikti qalyptastyrady», - deidi Úkimet basshysy.
Asqar Mamin jańartylǵan bilim berý mazmuny boiynsha sabaqtar praktikaǵa baǵyttalǵan belsendi oqytý ádisterin qoldana otyryp júrgiziletinin atap ótti. Sondai-aq ishki ister organdary mektepterde kámeletke tolmaǵandardyń quqyqtaryn qorǵaý máseleleri boiynsha turaqty aqparattyq jumys júrgizetinin jetkizdi.
«Jeke quqyqtarmen bailanysty máseleler oqýshylardyń quqyqtyq mádenietin úzdiksiz qalyptastyra otyryp, bilim berýdiń barlyq deńgeilerinde zertteletinin eskere kele bastaýysh synyptarǵa «Quqyq negizderi» jeke pánin engizý orynsyz dep sanaimyz», - deidi Asqar Mamin.
