Bastaýysh mektep «sumdyq pikir, sýyq qoldan» tynysh bolýy kerek. Mundai pikirdi Memlekettik tildi damytý institýtynyń atqarýshy direktory, filologiia ǵylymdarynyń kandidaty Bijomart Qapalbek aitty, dep habarlaidy QazAqparat.
«Ahmet Baitursynulynyń «Balam deitin jurt bolmasa, jurtym deitin bala qaidan shyǵady» degen sózi bar. Biz qazir «balam» dep tárbielemesek, ulttyń tamyryn, dinin qataitpasaq, ol bala batystyń da, shyǵystyń da «jeline» domalaityn bolady. Ulttyq qundylyq, ulttyq tarih, salt-dástúr, mádeniet - barlyǵy da ana tilinen shyǵady. Ásire shyǵysshyl da, ásire batysshyl da ana tiline qanyqpaǵannan shyǵady. Balanyń tamyry qańbaq siiaqty bolady. Al bizge bolashaǵymyzǵa myqtap serttesý úshin balany ulttyq qundylyqqa tolyq tamyr jaiatyndai deńgeide ósirýimiz kerek. Til mádenietten de, bilimnen de, aqparattan da úlken. Til solardyń saqtalatyn ydysy, taratylatyn, jetkiziletin quraly. Iaǵni, biz aldymen, tildi durystaýymyz kerek. Tárbieniń barlyǵy aldymen, bastaýysh mektepten bastalady», - dedi ol Otbasy kúni aiasynda ótken dóńgelek ústel otyrysynda.
Onyń aitýynsha, qazirgi ýaqytta dástúrli tárbie kózi bolǵanymen - álsiz. Búgingi urpaqty elektrondy quraldar men gadjetter tárbielep otyr.
«Osy oraida mekteptiń róli óte erekshe. Óitkeni, bala 6 jastan 17 jasqa deiingi ǵumyryn mektepte ótkizedi. Bastaýysh mektep «sumdyq pikir, sýyq qoldan» tynysh bolýy kerek», - dedi ǵalym.
Sonymen qatar ol qazaq tiliniń Qazaqstan aýmaǵynda tolyq taralýy qajettigin basa aitty.
«Qazir qazaq tilin tómennen talap etý kúshti. Áleýmettik jelide «Men Qazaqstanda, óz jerimde turmyn. Maǵan qazaqsha qyzmet kórsetińiz» degen talap kúsheie túsken. Endi til saiasatyn da soǵan qarai ózgertýmiz kerek. Óitkeni, «memlekettik» degen anyqtamasy bar memlekettik til memlekettik shekara men memlekettik qaýipsizdik deńgeiinde qorǵalýy tiis», - dedi Bijomart Qapalbek.
