«Atameken» ulttyq kásipkerler palatasynyń basqarma tóraǵasy Abylai Myrzahmetov «Bastaý-Biznes» baǵdarlamasynyń 5 jyldyǵyna arnalǵan forýmda ilki jobanyń qalai qolǵa alynǵanyn aitty, dep habarlaidy QazAqparat.
«Ár bastamanyń iesi bolady. Osydan 5 jyl buryn Eldar (Jumaǵaziev) pilottyq joba retinde alyp kelip, kieli, munaily Mańǵystaý óńirinen bastadyq. Peiilimiz durys bolǵan shyǵar, sol bastamamyz eldiń kóńilinen shyǵyp, keń tarady», - dep bastaǵan Abylai Myrzahmetov baǵdarlama aiasynda qansha adamnyń kásip bastaýǵa múmkindik alǵanyn atady.
«Aldymen ár aýdanǵa bardyq. Keiin qalalar men oblystardy araladyq. Qazir Almaty, Nur-Sultan, Shymkent siiaqty úlken qalalarda bul baǵdarlamaǵa suranys joǵary bolyp jatyr. Sondyqtan bizdiń maqsatymyz keńeiip ketti.(...) 185 myń adam, onyń ishinde 55 myń adam óz isin ashyp, jumys istei bastady. Ras, qarajat áli de jetispeidi. Elimizdiń Prezidenti Joldaýynda óte jaqsy aitty. Shaǵyn mekemelerdi ashyp, solardy qoldaý kerek. Óitkeni osynda otyrǵan «Bastaý Biznes» baǵdarlamasyna qatysýshylardyń bári shaǵyn kásipkerler. Jańaǵy 55 myń azamattyń 37 myńy granttyń arqasynda aiaqqa turdy», - dedi Abylai Myrzahmetov.
«Atameken» basshysy bul grantty usynýdaǵy negizgi maqsat – adamdardyń ózine-ózi degen senimin ashý.
«Bul úlken bir júie bolyp otyr. 5 jylda tái-tái basyp, Elbasynyń, Úkimettiń qoldaýynyń arqasynda ujym bolyp osyndai dárejege jetti», - dedi ulttyq kásipkerler palatasynyń basqarma tóraǵasy.
