Turǵyn úi kezegine turǵan keibir qazaqstandyqtardyń jyljymaityn múlki bar bolyp shyqty. Bul týraly «Otbasy bank» AQ basqarma tóraǵasy Lázzat Ibragimova málim etti, dep habarlaidy QazAqparat.
«Turǵyn úi kezeginde turǵan 46 azamattyń ótinimi keri qaitaryldy. Sebebi olardyń jyljymaityn múlki bar. Al ereje boiynsha turǵyn úi kezeginde turǵan azamat atynda jyljymaityn múlik bolmaýy tiis. Demek jergilikti ákimdik turǵyn úi kezeginde turǵan azamattardy teksermei, úi kezegine qoia beredi degen sóz», - dedi Lázzat Ibragimova Ortalyq kommýnikatsiialar qyzmeti alańynda ótken baspasóz máslihatynda.
Bank basshysynyń aitýynsha, keibir ákimdikter turǵyn úi kezeginde turǵandarǵa monitoring júrgizbeidi.
«Sonymen qatar 52 klienttiń salyq boiynsha qaryzy bolǵan. Sol siiaqty 46 klientke tólem mindeti júktelgen. Bul degenimiz atalǵan azamattardyń basqa bank aldynda qaryzy bar degen sóz. Olar basqa bank esepshotyndaǵy qarjysyn meńgere almaidy. Biz qazir bul máseleni sheshýdiń zańdy jolyn qarap jatyrmyz. Indýstriia jáne infraqurylymdyq damý ministrligi tiisti zańnamanyń jobasy ázirlendi. Ol qazir Májilistiń qaraýynda jatyr. Bul - Qazaqstanda alǵash qolǵa alynyp otyrǵan joba. Iaǵni memleketten sýbsidiia alý úshin arnaiy esepshottyń bolýy. Ol esepshotqa túsken qarjyny basqa bank bizge qaryz dep sheship almaýy tiis. Eger ol azamattyń salyq boiynsha qaryzy bolsa da, memleket berip turǵan basqa múmkindikti paidalanýǵa quqyǵy bar», - deidi ol.
