Kelesi jyly «Nurly jer» baǵdarlamasy óz jumysyn bastaǵaly otyr. Baǵdarlama boiynsha 2031 jylǵa deiin turǵyndarǵa 600 myń jer ýchaskesi úlestiriledi. Bul joba qarapaiym azamattardyń baspanaly bolýyna óz septigin tigizbek. Biraq, qurylys kompaniialary bul baǵdarlamaǵa qatyspaýy kerek. Astanada «Nurly jer» turǵyn úi saiasaty jáne ony júzege asyrý asyrý tetikteri» taqyrybynda ótken otyrysta «Bolashaq» jastar qozǵalysynyń jetekshisi Dáýren Babamuratov osylai málimdedi, dep habarlaidy Baq.kz tilshisi.
«Sózdiń shyny kerek, Úkimet qolǵa alǵan barlyq baǵdarlamaǵa úlken úmitpen qarap keldik. Osy joly da solai. Bul baǵdarlamaǵa da zor úmit artyp otyrmyz. Nátije beredi dep oilaimyz. Oǵan Qyzylorda men Aqtóbe oblystary dálel. Mysaly, Qyzylordada 6600 jer ýchaskesi óz ielerine berildi. Al «Jer týraly» kodekstiń 43-babynda «Qazaqstannyń árbir azamaty 10 sotyq jerge ielik ete alady» dep aitylǵan», - dedi ol.
Dáýren Babamuratov atalǵan baǵdarlama halyq arasynda turǵyn úi máselesin sheshýge óz septigin tigizetinin aitty.
«Nurly jer» baǵdarlamasy boiynsha bir otbasy jer telimin alsa, ol – úlken jeńis. Meniń oiymsha, bul baǵdarlama turǵyn úi máselesin sheshýge septigin tigizedi. Al 600 myń jer ýchaskesi halyqqa berilse, úlken kómek bolmaq. Qazirgi tańda elimizde shamamen 4 millionǵa jýyq otbasy bar delik. Onyń 600 myńy, iaǵni halyqtyń 12-15%-y jer alyp, baspanaly bolsa úlken jeńis emes pe. Biraq jer telimin alǵan soń, ony paidalaný kerek. Úi salý kerek. Sonda ǵana jer telimi sol adamnyń menshigine beriledi», - dedi ol.
Alaida, qoǵam belsendisi baspanany qurylys kompaniialaryna salǵyzýǵa qarsy.
«Joq, men muny qoldamaimyn. Óz basym buǵan qarsymyn. Turǵyndar óz úiin ózderi salyp alýy qajet. Al qurylystyń qalai bolsa solai júrgizilýine jol berilmeý tiis. Biraq, úidi salmas buryn turǵyn jergilikti bilik ókilderimen qurylysqa qatysty jumystardy retteýi kerek. Úilerdi qurylys kompaniialarynyń salýyna qarsymyn», - dedi ol.
