Indýstriia jáne infraqurylymdyq damý ministri Beibit Atamqulov Qazaqstanda baspana kezeginde turǵandardyń arendalyq tólemi úshin sýbsidiia qalai beriletinin túsindirip berdi, dep habarlaidy QazAqparat.
«Memleket basshysynyń halyqqa Joldaýynda belgilengen tapsyrmalardy oryndaý úshin arendalyq tólemdi sýbsidiialaý mehanizmderin ázirleý boiynsha usynystar daiyndalady. Halyqaralyq tájiribe kórsetip otyrǵandai, turǵyn úi qorynyń 30 paiyzy – arendalyq úiler. Qazaqstanda bul kórsetkish 1,7 paiyzdy qurap otyr. Qazirgi ýaqytta kezekte turǵan azamattardyń sany - 530 myń. Bul rette, turǵyn úidi jaldaý aqysynyń bir bóligin sýbsidiialaý kózdelgen. Jumys kólemin memlekettik organdarmen qarastyryp jatyrmyz. Bul, shamamen 70-80 paiyz... Sonymen qatar ataýly kómekti «Otbasy bank» aiqyndaityn bolady. Olar Qazaqstanda turǵyn úige kezekte turǵan azamattardyń reestrin túzedi», - dedi Beibit Atamqulov Úkimet úiindegi baspasóz máslihatynda.
Bul rette, Indýstriia jáne infraqurylymdyq damý ministrligi naqty parametrlerdi aiqyndamaq.
«Azamatta kúnkóris minimýmyna teń kirisi bolýy kerek. Búgingi tańda ol soma – 32 668 teńgeni quraidy. Jalǵa berý ýaqyty – 5 jyl. Páterge muqtaj azamattyń mártebesi aiqyndalýy tiis. Odan bólek, ortasha aýmaq 60 sharshy metrdi quraidy. Iaǵni beriletin páterdiń kólemi 40-80 sharshy metr aralyǵynda bolady. Ár óńirdegi páterdi jalǵa berý somasy anyqtalady. Qazirgi ýaqytta bul mehanizm memlekettik organdardyń bárimen talqylanýda. 2020 jyldyń sońyna qarai mehanizmniń barlyq parametri «Nurly jer» baǵdarlamasymen aiqyndalady. Biz Úkimet qaýlysy arqyly ony qabyldaimyz. Biraq, álbette, bul másele memlekettik organdarmen ǵana emes, qoǵam ókilderimen de keńinen talqylanady», - dedi ministr.
