Ulttyq bank "7-20-25" turǵyn úi baǵdarlamasy boiynsha bastapqy jarnany tóleý úshin zeinetaqy jinaǵyndaǵy aqshany paidalaný týraly usynysty qoldamaidy. Bul týraly Ulttyq bank tóraǵasy Daniiar Aqyshev aitty, dep habarlaidy Sputnik Qazaqstan tilshisi.
"7-20-25" turǵyn úi baǵdarlamasy boiynsha bastapqy jarna baspana qunynyń 20 paiyzy mólsherinde belgilenip otyr. Biraq turǵyndardyń kópshiliginde mundai qarajat joq. Sondyqtan "Nur Otan" partiiasynda ótken otyrysta bastapqy jarnany tóleý úshin azamattardyń zeinetaqy qoryndaǵy aqshasyn paidalaný usynylǵan edi.
"Joq, bul jaǵdaida Ulttyq bank bul ideiany múldem qoldamaidy. Azamattar biryńǵai jinaqtaýshy zeinetaqy qorynda jinap jatqan qarjy qazir olardyń áleýmettik máselesin sheshýge emes, zeinetke shyqqannan keiin eńbekke qabiletsizdigin qamtamasyz etýge arnalǵan. Bizde qabyldanǵan zeinetaqylyq qamtamasyz etý tujyrymdamasy osyndai. Biz bul ideiany qoldamaimyz, eshqandai ondai amal qarastyrylmaidy", — dep jaýap berdi Ulttyq bank tóraǵasy jýrnalisterdiń qoiǵan suraǵyna.
Eske sala ketsek, prezident "7 – 20 – 25" jańa turǵyn úi baǵdarlamasyn usynǵan edi. Jumys isteitin árbir qazaqstandyq tómendegidei sharttar boiynsha teńgemen nesie alý múmkindigine ie bolady. Nesie ósiminiń mólsherlemesi qazirgidei 14-16 emes, jylyna 7 paiyzdan aspaidy. Bastapqy jarna baspana qunynyń 20 paiyzy mólsherinde, al nesie alýshynyń ai saiynǵy tólemin azaitý úshin onyń merzimi 10-15 emes, 25 jylǵa deiin bolady. Bankterden kreditterdi satyp alatyn operator qurylyp, ol "Baspana" ipotekalyq kompaniiasy dep atalmaq. Baǵdarlama 2018 jyldyń ekinshi jartysynan bastap iske qosylady.
