CC0 / Parentingupstream / Doctor
Astanadaǵy nómiri №14 mekteptiń baspaldaǵynan qulap ketken 2-synyp oqýshysynyń ata-anasy oqys jaǵdaidyń qalai bolǵanyn aityp berdi, - dep habarlaidy Sputnik Qazaqstan.
Oqiǵa 18 qyrkúiekte saǵat 17:15 shamasynda bolǵan.
"Bala qulaǵan soń qyryq minýttan keiin jedel járdem shaqyrǵan. Jedel járdem 50 minýttan keiin kelgen. Bizge aitpaǵan. Biz bir saǵattan keiin estidik. Mektep baspaldaǵynyń janynda qorǵanys temiri joq. Kishkentai bala túgil, úlken oqýshy da qulap ketedi ana jerden. Oqýshylardyń qaýipsizdigi oilastyrylmaǵan", - deidi zardap shekken oqýshynyń ákesi Bekjan Qojamqulov.
Onyń aitýynsha, balanyń qazirgi jaǵdaiy óte aýyr.
"Dárigerlermen jańa ǵana sóilestik. Biz táýekelge bara almaimyz dep, balama ota jasaýdan bas tartyp jatyr. Ashyq bas súiek jaraqatyn alǵan. Kózdiń ainalasy, muryn ishindegi súiegi synǵan. Dárigerler balamnyń eki kózi 50% kórmeidi dedi. Endi sheteldik dárigerlerdiń kómegine júginýimiz kerek. Bizdiń dárigerler "10 kún aýrýhanada emdeimiz, sosyn úige shyǵaramyz" dep otyr. Al balama otany dereý jasamasaq bolmaidy", - deidi Bekjan Qojamqulov.
Ol bala qulaǵan baspaldaqqa tikelei mektep basshylyǵy jaýapty dep esepteidi.
"Mektep direktory "munda jumys istegenime 9 ai ǵana boldy" dep jaýapkershilikti moinyna almai otyr. Al meniń balamdy emdetýge qyrýar qarajat kerek. Bar shyǵynyn mektep ákimshiligi ótep bersin", - deidi áke.
Al qalalyq bilim basqarmasy baspaldaqta qorshaý bar dep otyr.
"Astana qalasynyń № 14 mektep-gimnaziiasynyń oqýshysy 2-qabatqa kóterilgende baspaldaqtan qulady, negizi baspaldaq qorshaýy bar. Balanyń aitýynsha, ony synyptasy iterip jibergen. Oqiǵa ornyna dereý jedel járdem shaqyryldy. Bala qalalyq balalar aýrýhanasynda jatyr. Esin biledi, jaǵdaiy turaqty. Komada bolǵan joq", - deidi vedomstvo.
Bilim basqarmasynyń aitýynsha, qazirgi kúni mektep direktoryna qatysty shara qabyldaý týraly másele qarastyrylyp jatyr.
