Elordada jaiaý júrginshiler ótkelinde jasóspirimdi kólik qaǵyp ketti. Bul oqiǵa jelide qyzý talqylanýda, dep habarlaidy "Ult aqparat".
«Juma kúni men astanadaǵy sol jaǵalaýdyń qaq ortasynda bolǵan jol-kólik oqiǵasynyń kýágeri boldym. 1999 jyly týǵan jas jigit jaiaý júrginshiler ótkelinde jasóspirimdi qaǵyp, oqiǵa ornynan qashyp ketti. Oqiǵa ornynan izin sýytqanymen qoimai kóligin fitnes-ortalyqtyń aýlasyna alańsyz qańtaryp, jattyǵýǵa kirispekshi boldy. Qasymda turǵan taǵy bir qyzben birge dereý jol politsiiasy men jedel járdem shaqyryp úlgerdik», - dep jazdy Sarah Bersan atty Facebook qoldanýshysy.
Kýágerdiń aitýynsha, zardap shekken jasóspirim 2004 jyly týǵan eken. Ata-anasy bolmaǵandyqtan, insýlttan keiin sal bolyp jatqan ájesimen birge turatyn kórinedi. Al ony qaqqan kólik iesi 14 mamyrda nebári 22 jasqa tolady eken. Oqiǵa kýágeri ol jigittiń ákesi sheneýnik ekenin de anyqtaǵan.
Nur-Sultan qalasynyń politsiia departamenti jol-kólik oqiǵasy bolǵanyn rastap otyr.
«Aǵymdaǵy jyldyń 30 sáýirinde saǵat 15.13-te 21 jastaǵy júrgizýshi «Toyota Camry» markaly avtokólikpen Syǵanaq kóshesi jaqtan Túrkistan kóshesiniń boiymen kele jatyp №2 úidiń tusynda 2004 jyly týǵan kámeletke tolmaǵan jaiaý júrginshini qaǵyp ketti. Zardap shegýshi jaiaý júrginshilerge arnalǵan bólikten ótip bara jatqan. Qazir zardap shekken bala em qabyldaýda. Alynǵan dene jaraqattarynyń aýyrlyq dárejesin sot-meditsinalyq saraptama anyqtaidy. Tiisinshe, júrgizýshiniń áreketine quqyqtyq turǵyda baǵa beriledi. Atalǵan fakti boiynsha aldyn ala tergeý júrip jatyr», - deidi departament mamandary.
Bes kún buryn bolǵan oqiǵany jurtqa jariia etken jeli qoldanýshysyna Nur-Sultan qalasyndaǵy ákimshilik politsiia basqarmasynyń basshysy Eljan Chýpekov jón siltedi.
«Sara Bersan, ákimshilik politsiia bóliminiń basshysy Toqjumanov Baýyrjanmen bailanysyńyz. Bul material qalalyq politsiia departamentiniń bastyǵy general E.S.Sádenovtiń jeke baqylaýynda. Jasóspirimniń jalǵyz qamqorshysy da aýrýhanada jatqanyn eskersek, oqiǵa shynymen de nazar aýdarýǵa turarlyq» - dep jaýap qatty Eljan Chýpekov.
