QR Básekelestikti qorǵaý jáne damytý agenttiginiń (BQDA) taýar naryqtaryna kirý kedergilerin anyqtaý jáne joiý jónindegi keńesterinde kóteriletin negizgi taýar naryqtaryndaǵy básekelestikti damytýdyń ózekti máseleleri Qazaqstan Respýblikasynyń ekonomikasyn jańǵyrtý jónindegi memlekettik komissiianyń otyrystarynda qaralady.
Vedomostvonyń málimetinshe, mundai sheshim Keńester jumysynyń tiimdiligin arttyrý jáne Qazaqstan Respýblikasynyń Úkimeti qabyldaityn sharalardy úilestirý maqsatynda qabyldandy. Birlesken otyrystardy aiyna keminde bir ret ótkizý josparlanyp otyr. Sondai-aq Memlekettik komissiiada Kedergiler kartasyna engizilgen máselelerdiń oryndalýy týraly esepter qaralyp, kúrdeli máseleler boiynsha sheshimder qabyldanatyn bolady. Birinshi bolyp kezekti Memlekettik komissiianyń qaraýyna agroónerkásiptik keshendegi memlekettik sýbsidiialaý kezinde básekelestikti shekteýge qatysty Kedergiler kartasynyń máseleleri jáne olardy joiý jónindegi usynystar shyǵarylatyn bolady.
BQDA Keńesteri Memleket basshysy jariialaǵan «Halyq únine qulaq asatyn memleket» tujyrymdamasyn iske asyrý sheńberinde kraýdsorsing qaǵidattary negizinde quryldy. Keńester elimizdiń 17 óńirinde, respýblikalyq keńes Nur-Sultan qalasynda quryldy, olardyń árqaisysy biznes, ekonomika, óndiris jáne negizgi salalardyń túrli salalarynda jumys isteitin 12 sarapshydan turady, barlyǵy 216 adam.
Keńesterdiń otyrystaryna básekelestikti damytýdyń negizgi tejeýshi faktorlary jáne taýar naryqtaryna kirýdiń retteýshi tosqaýyldary talqylaýǵa shyǵarylady. Óńirlik keńesterdiń otyrystarynda anyqtalǵan kedergiler BQDA-ǵa jumys úshin beriledi.
Qazirgi kezde Keńester otyrystarynyń qorytyndylary boiynsha taýar naryqtaryna kirý kedergilerin joiý boiynsha 58 usynys qalyptastyryldy, olar naqty merzimderi bar jáne jaýapty oryndaýshylary bar Kedergiler kartasyna engizildi.
