Qazaqstannyń bas sanitarlyq dárigeri Jandarbek Bekshin Zaisandaǵy ahýalǵa qatysty pikir bildirdi, dep habarlaidy QazAqparat.
«Bizdiń jerlesterimizdiń birazy Ońtústik Koreiaǵa emdelýge barady. Olardyń immýniteti tómen bolýy múmkin. Bul elderdiń halyq tyǵyzdyǵy joǵary. Singapýr, Gonkong, Taivanda osyndai. Árine bul óte qaýipti. Osy elderge barýdy josparlaýdyń qajeti joq. Bizdi sondai-aq alańdatatyn – Italiia eli. Qazirgi tańda onda 144 jaǵdai bar. Italiianyń soltústiginde Milanda kóptep tirkelýde. Tek resmi alynǵan Dúniejúzilik densaýlyq saqtaý uiymynyń, osy elderdiń Densaýlyq saqtaý ministrlikteriniń málimetinen basqa BAQ-ty biz paidalanbaimyz», - dedi ol.
Jandarbek Bekshin bul rette elimizde jaǵdai turaqty ekenin jetkizdi.
«Ótken aptada men QHR-men shekarany aralap, avtokóliktik, temir jol ótkelderin qarap shyqtym. Ol jerde naqty baqylaý bar. Baqylaýdy kúsheitip, biz sanitarlyq 20 dárigerdi qosymsha qostyq. Sondyqtan táýlik boiy shekaramyz tekserýde. Bizde QHR-dan avtobýspen, temir jolmen, resmi túrde áýe jolymen qazir kelip jatqan jolaýshylar joq. Osyǵan qaramastan qaitalap aitqan elderdi naqty baqylaýǵa aldyq. Basqa elderde koronavirýs órship barady. Ol elderden kelýshilerdiń kelýine kedergi qoiyp jatyrmyz. Árbir ushaq baqylaýda», - dedi ol.
Jandarbek Bekshin sonymen qatar, Shyǵys Qazaqstanda, sonyń ishinde Zaisan óńirinde koronavirýs juqtyrmaq túgili ondai kúdikke ilingen eshqandai adamnyń aýrýhanaǵa jetkizilmegenin resmi túrde málimdedi. Sonymen qatar, bas sanitarlyq dárigerge Zaisanda jumys isteitin Qytai azamattaryna qatysty suraq qoiyldy.
«Ol azamattar ótken jyldan beri jumys istep keledi. Álbette olar óz lagerinde, iaǵni turǵylyqty jerde emes, qala syrtynda jumys isteidi. Eger olar qaityp kelse, óz jaqtaryndaǵy lagerde 14 kúndik karantinnen ótedi. Keiin kelgen 4 adam bar. Olardyń karantinderi búgin aiaqtalady. Eshqandai aryz-shaǵym joq. Jaǵdai baqylaýda», - dedi ol.
