Densaýlyq saqtaý ministrliginiń resmi saitynda Qazaqstannyń bas memlekettik sanitarlyq dárigeri Jandarbek Bekshinniń «Qazaqstan Respýblikasynda koronavirýs infektsiiasynyń taralýyna jol bermeý boiynsha qosymsha sharalardy engizý týraly» qaýlysy jariialandy, dep habarlaidy "Ult aqparat".
«Qazaqstan Respýblikasynda COVID-19 koronavirýs infektsiiasynyń taralý qaýpin eskertý maqsatynda QAÝLY ETEMIN:
1. Osy qaýlynyń 1-shi qosymshasyna sáikes COVID-19 juqtyryp alý qaýpi joǵary jerde bolǵan adamdarǵa karantin túrin taǵaiyndaý tártibi bekitilsin.
2. Oblys ákimderi, Almaty, Nur-Sultan, Shymkent qalalarynyń ákimderi:
1) COVID-19 aýrýyn juqtyrýy múmkin kúdiktiler úshin qosymsha provizorlyq statsionarlardy ashsyn;
2) osy qaýlynyń 2-qosymshasyna sáikes naýqastarmen bailanysta bolǵan nemese koronavirýs infektsiiasyn juqtyrǵan adamdardy oqshaýlaý úshin karantindik aýrýhanalardy daiyndasyn;
3) osy qaýlynyń 1 qosymshasyna sáikes nusqaýlyq boiynsha naýqastarmen bailanysta bolǵan nemese koronavirýs infektsiiasyn juqtyrǵan adamdar tasymaldansyn», dep atap kórsetilgen qujatta.
Qaýlynyń tolyq mátinin myna siltemeden kórýge bolady.
