Qazaqstannyń Bas sanitariialyq dárigeri Erlan Qiiasov málimdeme jasap, el turǵyndaryn koronavirýs keń tarap jatqan memleketterge barýdan bas tartýǵa shaqyrdy, dep habarlaidy "Ult aqparat" QR Úkimeti janyndaǵy Qazaqstanda koronavirýstyń taralýyna jol bermeý jónindegi vedomstvoaralyq komissiianyń Telegram kanalyna silteme jasap.
«Qurmetti qazaqstandyqtar!
Jaqyn arada COVID-19 boiynsha epidemiologiialyq ahýaly asa qolaisyz elderge demalysty nemese ózge de saparlardy josparlaǵan barlyqtaryńyzǵa málimdeme jasaǵym keledi.
Men koronavirýstyq infektsiiasy keń taraǵan Úndistan, Túrkiia, sondai-aq Eýropanyń, Latyn Amerikasynyń, ońtústik-shyǵys Aziianyń keibir elderine barýdan bas tartýdy suraimyn. Atalǵan elderde kún saiyn qaýipti indetti juqtyrǵandar sany eselep artyp, antirekordtyq kórsetkish kún saiyn jańarýda.
Ǵalymdar koronavirýstyq infektsiianyń jańa shtamdarynyń juǵý jyldamdyǵy óte joǵary jáne qoǵamǵa, jalpy densaýlyq saqtaý júiesine asa qaýip tóndiredi dep dabyl qaǵýda.
Sondyqtan demalysty keiinge qaldyrýǵa keńes beremin, óitkeni bul sizdiń densaýlyǵyńyz ǵana emes, sizdiń jaqyndaryńyzdyń amandyǵy, ult densaýlyǵy ekendigin umytpańyz!», - delingen málimdemede.
