Qazaqstan Respýblikasynyń bas sanitary Jandarbek Bekshin koronavirýs infektsiiasynyń Qazaqstanǵa kirý yqtimaldyǵyna qatysty ǵalymdar boljamymen bólisti, dep habarlaidy "Ult aqparat".
«Barlyq tiisti sharany iske asyryp jatyrmyz. «Sheńber» aiasy qysylyp bara jatqanyn kórip otyrsyzdar. Qytai ǵana edi basynda. Qazir Iran, Ońtústik Koreia, artynsha koronavirýs Eýropa elderin sharpydy. Infektsiia tirkelgen elderdiń ortasynda qaldyq. Álbette, bizge virýs kirmeidi dep kepildik bere almaimyz. Virýs – qamap tastaityn «mal» emes. Adam nemese janýardyń boiynda ósip-órkendei beredi. Kún sáýlesi ony jeńe me, joq pa degen de suraq qoiylyp jatyr. Alaida bulai oilasaq, kún jarqyrap turǵan Irandy qarańyz. Virýs kez kelgen janýardyń azǵasynda dami beredi dep aitar edim. Bizdiń mindet – tártip bolatyndai uiymdastyrý jumysyn kúsheitý», - dedi Jandarbek Bekshin OKQ-da ótken baspasóz máslihatynda.
Onyń aitýynsha, densaýlyq saqtaý ministrliginiń janynda arnaiy top bar. Oǵan kiretin mamandar koronavirýstyń kelý ýaqytyna boljam jasaidy. Boljam boiynsha naýryz aiynyń 11-16 aralyǵynda Qazaqstanda koronavirýs tirkelýi múmkin.
«Biraq bul tek boljam ǵana. Koronavirýs bizde paida bolǵan jaǵdaida biz birden arnaiy sharalardy qolǵa alamyz», - dedi ol.
Bas sanitar dárigerdiń sózinshe, bul boljam ǵalymdardyń matematikalyq modeldi esebine súiene jasalǵan.
«Biz jaǵdaidy zerttep otyrmyz. Sheńberdiń ishinde qaldyq. Tirkelýi ábden múmkin, biraq qashan ekeni belgisiz. Ǵalymdar 10-16 naýryz aralyǵy dep boljaǵanymen, ol tek tuspal. Bir apta ary, bir apta beri. Boljam oryndalmai qalýy da múmkin», - dedi ol.
Covid-19 dep atalatyn jańa koronavirýs 2019 jyldyń jeltoqsanynda tarala bastady. Qytaidyń Ýhan qalasynda (Hýbei provintsiiasy) buryn-sońdy belgisiz bolǵan aýrý órshidi. Qazir koronavirýs álemniń 100-ge jýyq elinde anyqtaldy. Djon Hopkins institýtynyń málimetinshe, álemde 113 773 adam koronavirýs juqtyrǵan, 4 008 adam kóz jumdy. 63 663 adam aýrýdan aiyqty.
Qazaqstanda ázirge koronavirýs tirkelgen joq.
