Qańtar oqiǵasy kezinde UQShU áskeri lańkestikke qarsy operatsiiaǵa qatysqan joq. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaidy QazAqparat.
Onyń aitýynsha, qańtar oqiǵasy kezinde Qazaqstannyń territoriialyq tutastyǵyna qaýip tóndi.
«Bul faktorlar Ujymdyq qaýipsizdik týraly sharttyń 4-babyna sáikes, UQShU-ǵa múshe elderdiń bitimgerlik kontingentin tartý úshin negiz boldy. Olardyń basty maqsaty strategiialyq mańyzdaǵy nysandardy qorǵaý boldy. Lańkestikke qarsy operatsiialardy ótkizý kezinde UQShU áskeri qatyspaǵanyn airyqsha atap ótemin», - dedi Berik Asylov.
Budan buryn habarlanǵandai, Bas prokýror qańtar oqiǵasy kezinde 11 aimaqta agressivti toptar zorlyq-zombylyq satysyna ótkenin aitty.
«3-shi, 4-shi jáne 5-shi qańtarda Memleket basshysy demonstranttarǵa úndeý joldap, zańdy saqtaýǵa jáne destrýktivti kúshterdiń arandatýyna boi bermeýge shaqyrdy. Alaida, birneshe márte sabyr saqtaýǵa shaqyrýǵa qaramastan, qylmystyq jáne radikaldy elementter belsendi de qatań áreketterge kóshti. 4-shi jáne 5-shi qańtarda azamattar jiyny agressivti topqa ainalyp, 11 aimaqta zorlyq-zombylyq satysyna ótti», - dedi Asylov.
