Memleket basshysy Bas prokýror Ǵizat Nurdáýletovti qabyldady, dep habarlaidy Aqordanyń baspasóz qyzmeti.
Prezidentke «qasiretti qańtar» oqiǵasyn tergep-tekserý jumystarynyń barysy jáne ruqsat etilmegen tergeý ádisterine qatysty azamattar men quqyq qorǵaýshylardyń málimetteri negizinde qabyldanyp jatqan sharalar týraly baiandaldy.
Qasym-Jomart Toqaevqa búginde 3070 qylmystyq is qozǵalǵany týraly málimet berildi. Onyń 2710-yn, sonyń ishinde, negizinen, urlyq, tonaý, buzaqylyq, qarý urlaý jáne basqa da qylmystardy ishki ister organdary tergep-tekserip jatyr.
Bas prokýrordyń aitýynsha, Sybailas jemqorlyqqa qarsy qyzmet quqyq qorǵaý organdary qyzmetkerleriniń laýazymdyq ókilettikterin asyra paidalanǵany týraly azamattardyń shaǵymdary boiynsha 173 isti júrgizýde. Memleketke opasyzdyq jasaý, ókilettikterdi asyra paidalaný jáne bilikti basyp alýǵa áreket etý boiynsha 15 is Ulttyq qaýipsizdik komitetiniń qaraýynda jatyr. Sondai-aq arnaýly prokýrorlardyń basshylyǵymen vedomstvoaralyq tergeý toby jappai tártipsizdikter men terrorizm aktileri boiynsha 179 isti tekserýde.
Tártipsizdikter órship turǵan kezde qyzmettik ǵimarattardy tastap ketken kúshtik qurylymdar organdarynyń laýazymdy tulǵalaryna qatysty bólek tergeý júrgizilýde. Osyndai áreketterdiń saldarynan Almaty qalasynda, Almaty jáne Jambyl oblystarynda quqyq qorǵaý organdarynyń arsenalyndaǵy 1500-nan astam qarý qylmyskerlerdiń qolyna túsken.
Jalpy alǵanda, qańtar oqiǵasy kezinde 3388 qarý, onyń ishinde 10 ańshylyq dúkeninen 1629 myltyq urlanǵan. Osynyń tek úshten biri nemese 967 qarý tabyldy. Qarýlardy izdeý jáne qaitaryp alý jumystary jalǵasyp jatyr. Barlyq faktiler boiynsha tergep-tekserý júrgizilýde.
Budan bólek Ǵizat Nurdáýletov Prezidentke janar-jaǵarmai materialdary, suiytylǵan gaz ainalymy jáne baǵany belgileý, kedendik shekara salasyndaǵy tekserýdiń aldyn ala nátijeleri týraly esep berdi.
Memleket basshysy qylmystyq qýdalaýǵa túsken azamattardyń konstitýtsiialyq quqyǵyn saqtaýdyń mańyzdy ekenin atap ótti. Qasym-Jomart Toqaev kináli adamdarǵa qatysty jaýapkershilik sharalaryn qabyldai otyryp, árbir rastalǵan habarlamaǵa der kezinde nazar aýdarýdy, sondai-aq tergeý barysy jóninde halyqqa ýaqtyly aqparat berýdi tapsyrdy.
