Memleket basshysy Bas prokýror Berik Asylovty qabyldady, - dep habarlaidy "Ult aqparat" Aqordaǵa silteme jasap.
Prezident Qasym-Jomart Toqaevqa elimizdegi zańdylyq pen quqyqtyq tártiptiń jai-kúii, sondai-aq qadaǵalaýshy organnyń qyzmetindegi basym baǵyttar jóninde málimet berildi.
Berik Asylov zańsyz iemdenilgen aktivterdi qaitarý úshin qabyldanyp jatqan sharalar jáne osy maqsatta jańadan qurylǵan Komitettiń qyzmeti týraly baiandady. Bas prokýrordyń aitýynsha, Komitet shetelge shyǵarylǵan aktivterdi izdeý, zańsyz shemalardy áshkereleý úshin jasandy intellektini paidalaný arqyly IT tehnologiialardy qoldanady.
Memleket basshysyna mańyzdy investitsiialyq jobalardy quqyqtyq turǵydan qoldaý jumystary jóninde aqparat berildi. Quramyna Syrtqy ister ministrligi, "Qazaq-Invest" UK" AQ, "Atameken" UKP ókilderi jáne Biznes-ombýdsmen kiretin arnaýly Vedomstvoaralyq komissiia investitsiialyq ahýaldy jaqsartýǵa baǵyttalǵan alǵashqy sharalardy ázirledi. Prokýrorlar 900-den astam investitsiialyq jobany baqylaýǵa aldy. Qazirdiń ózinde 41 investordyń túitkildi máseleleri sheshimin tapty.
Prezidentke investitsiianyń qaýipsizdigine kepildi kúsheitý úshin investitsiialyq jobany júzege asyrýdyń búkil protsesin naqty ýaqyt rejiminde baqylaýda ustaýǵa múmkindik beretin tsifrlyq sheshimder engizý, sondai-aq memlekettik organdardyń bizneske qatysty negizgi sheshimderin prokýrormen kelisý usynyldy.
Sonymen qatar Qasym-Jomart Toqaevqa úsh býyndy model aiasynda kásipkerlerdi qylmystyq qýdalaý 3 ese qysqarǵany (614-ten 204-ke deiin) jóninde málimet berildi. Jalpy, elimiz boiynsha 1041 tulǵanyń negizsiz qylmystyq qýdalaýǵa tartylýyna jol berilgen joq. Konstitýtsiialyq quqyq buzýshylyqtar sany 29 paiyzǵa qysqardy (310-nan 222-ge deiin).
Budan bólek, Prezidentke azaptaýǵa qarsy is-qimyl sharalary jóninde baiandaldy. Mundai áreketterdiń aldyn alý úshin 54 túzetý mekemesinde 29 myń beinekamera ornatylǵan, sáikesinshe azaptaý faktilerine shaǵymdaný da 94-ten 17-ge deiin azaiǵan.
Sondai-aq Bas prokýror qoǵamda rezonans týdyrǵan qylmystardyń tergelý barysy jóninde esep berdi. Atalǵan máselelermen qatar, halyqaralyq yntymaqtastyq baǵytynda atqarylǵan jumystardyń nátijesi tanystyryldy. Atap aitqanda, biyl shetelden aýyr jáne asa aýyr qylmys jasady dep aiyp taǵylǵan 40 adam ekstraditsiialandy. Jalpy Qazaqstan qylmystyq-quqyqtyq sala boiynsha alys sheteldiń 34 memleketimen 74 shartqa qol qoidy.
Kezdesý sońynda Qasym-Jomart Toqaev elimizdiń tynys-tirshiligine qatysty barlyq salada zańnyń saqtalýyn qamtamasyz etý isin kúsheitý qajet ekenine nazar aýdardy.
