Foto: Akorda.kz
Memleket basshysy Bas prokýror Berik Asylovty qabyldady, dep habarlaidy "Ult aqparat" Aqordanyń resmi saityna silteme jasap.
Prezidentke elimizdegi zańdylyqtyń saqtalý jaǵdaiy men ótken kezeńdegi basym baǵyttar boiynsha júrgizilgen qadaǵalaý jumystarynyń nátijesi týraly esep berildi.
Berik Asylov Abai oblysyndaǵy órt deregi boiynsha qozǵalǵan qylmystyq iske qatysty tergeý amaldary jóninde baiandady. Bas prokýrordyń orynbasarynyń basshylyǵymen quqyq qorǵaý jáne arnaýly organdardyń tájiribeli qyzmetkerlerinen vedomstvoaralyq jedel-tergeý toby quryldy. Tergeý qorytyndysy boiynsha laýazymdy tulǵalardyń áreketteri men áreketsizdigine quqyqtyq baǵa beriledi.
Memleket basshysyna rezonans týdyrǵan qylmystyq isterdi tergeý jáne qoǵam múddesin qorǵaý jónindegi jumystardyń qorytyndysy týraly da málimet berildi. Áleýmettik-ekonomikalyq salalardy tekserý nátijesinde 11 myń adam túrli deńgeide jaýapqa tartyldy. Tergeý amaldary júrgizilgennen keiin biýdjetke 10 milliard teńge qaitaryldy. Sotta 15,2 milliard teńge kóleminde memleket múddesi qorǵaldy.
Budan bólek, Qasym-Jomart Toqaevqa biznesti qorǵaý jáne mańyzdy investitsiialyq jobalardy qoldaý jónindegi tapsyrmalarynyń oryndalý barysy týraly da baiandaldy. Atap aitqanda, Bas prokýratýranyń bastamasymen 2 myńǵa jýyq kásipkerge zańsyz tekserý júrgizýdi kózdegen ártúrli ministrliktiń 9 buiryǵynyń kúshi joiyldy. Sondai-aq 2,5 milliard teńge óndirip alý jónindegi 21 myń salyq buiryǵy zańsyz dep tanyldy.
Sonymen qatar Bas prokýror Prezidentke qylmystyq ahýal jáne qylmystyq-quqyqtyq saladaǵy azamattardyń konstitýtsiialyq quqyqtaryn saqtaý úshin qabyldanyp jatqan sharalar týraly aitty.
Kezdesý sońynda Memleket basshysy Abai oblysyndaǵy órttiń mán-jaiyn obektivti túrde tergeý mańyzdy ekenine toqtalyp, elimizdiń áleýmettik jáne ekonomikalyq salalaryndaǵy zańdylyqtyń saqtalýyn qamtamasyz etý jóninde birqatar naqty tapsyrma berdi.
