Aqtóbe oblysyna Bas Prokýror Jaqyp Asanov bastaǵan jumys toby kelgen bolatyn. Óńirge kelgen mamandardyń negizgi maqsaty – el ishindegi jaǵdaimen tanysyp, jergilikti problemalardy sheshýge kómektesý. Bul týraly Aqtóbe jurtshylyǵymen kezdesýde Jaqyp Asanov málimdedi, dep jazady kerek-info.kz.
Aqtóbe óńirinde bir ai ýaqyt jumys jasaityn astanalyq top Elbasynyń tikelei tapsyrmasymen kelgenin aitty.
- Eki júzden asa maman keldik. Osynda Sizdermen birge jumys jasaimyz. Maqsatymyz bireýlerdi tekserý, kemshilik izdeý, baǵa berý emes. Jergilikti problemalardy birlese jumylyp sheshý. Jalpy jumysymyz 7 baǵyt boiynsha júrgizilmek. Halyq arasynda túsindirý jumystaryn júrgizý, shaǵyn kásipkerlikti damytý, áleýmettik problemalardy sheshý, dini ahýaldy jaqsartý, aqparattandyrý jumysy, quqyq qorǵaý qyzmetiniń tiimdiligin arttyrý bolyp tabylady. Jeti baǵyt boiynsha jeti salaǵa qatysty vitse-ministrler basqaryp keldi. Bar máseleni sheshemiz dep aitý qiyn, ol múmkin de emes. Biraq naqty josparlarymyz ben maqsattarymyz bar. Keiin osy tájiribeni basqa óńirlerde de qoldansaq degen oi bar. Biz ketken soń da jumys aiaqsyz qalmaidy degen úmittemiz. Bizdi qonaq dep, kún saiyn qydyrtýdy oilamai-aq qoiyńyzdar. Qonaq etken adam da, qonaq bolǵan adam da jazalanady. Biz munda jumys jasaý úshin keldik,- degen Bas Prokýror halyq pen sheneýnikterdiń bir-birin túsinbeitinin alǵa tartty.
“HALYQTY OIaTA ALMAI OTYRMYZ”
Aqtóbege bir ai jumys saparymen kelgen Bas Prokýror árbir qazaqstandyq úshin kúresý kerektigin alǵa tartty. Qazaqstannyń ár turǵyny úshin memleket tarapynan jasalyp jatqan baǵdarlamalardyń tiimdi paidalanylmai jatqanyn málimdedi.
- Memleket kóp múmkindik berip jatyr. Milliardtaǵan aqsha, qyrýar zańdar, baǵdarlamalar bar. Biraq osyny qalai paidalaný kerektigin halyq bilmeidi. Nege? Óitkeni, halyq sheneýnikti, sheneýnik halyqty túsinbeidi. Siresip qalǵan resmi tilmen emes, halyqqa kádimgi qarapaiym tilmen túsindirý kerek. Sheneýnikterdiń “óz” tili bar ekenin moiyndaimyz. Biraq, ol tildi qarapaiym halyq qaidan túsinsin? Adamdarǵa aqparatty túsinikti tilmen, qarapaiym túrde jetkize bilý kerek,- dedi Bas Prokýror Jaqyp Asanov.
