Qazaqstan Respýblikasy Bas Prokýrorynyń orynbasary Jandos Ómiráliev Prezident sailaýy aldynda qazaqstandyqtarǵa úndeý jasady, - dep habarlaidy "Ult aqparat".
Vedomstvo málimetinshe, áleýmettik jelilerde sot tyiym salǵan uiymnyń 20 qarashada zańsyz mitingilerdi ótkizýge, qatysýǵa jáne ózge de quqyqqa qaishy áreketter jasaýǵa shaqyrýlary tarap jatyr.
"Ulttyq jáne halyqaralyq quqyqqa sáikes, terrorizmdi nemese zorlyq-zombylyq ekstremizmdi nasihattaityn osyndai uiymdardyń kez kelgen qyzmetine tyiym salynǵanyn atap ótemin.
"Qazaqstan Respýblikasynda beibit jinalystar, mitingiler, sherýler, piketter men demonstratsiialar uiymdastyrý jáne ótkizý tártibi týraly" Zańmen (5-baptyń 6-tarmaǵy, 14-baptyń 1-tarmaǵynyń 2-tarmaqshasy) olardyń osyndai aktsiialardy uiymdastyrýyna jol bermeý bekitilgen.
Eger aktsiialar memlekettiń qaýipsizdigine nuqsan keltirýge, basqa da qylmystyq áreketter jasaýǵa baǵyttalǵan bolsa, olardy júrgizýge de jol berilmeidi (Zańnyń 14-babynyń 1-tarmaǵynyń 1-tarmaqshasy)", - deidi bas prokýrordyń orynbasary Jandos Ómiráliev.
Bul beibit jinalystardy uiymdastyrý men ótkizýdiń negizgi qaǵidattarynyń biri - olardyń zorlyq-zombylyqsyz sipaty men zańdylyǵyna, sondai-aq qoǵamdyq tártipti, densaýlyqty saqtaýdy, basqa adamdardyń quqyqtary men bostandyqtaryn qorǵaýdy qamtamasyz etýge bailanysty (Zańnyń 3-baby).
Atalǵan zańsyz áreketterdi jasaýmen ushtasqan tyiym salynǵan uiymdardyń shaqyrýlary, uiymdastyrýy jáne olarmen uiymdastyrylǵan aktsiialarǵa qatysqany úshin ákimshilik (ÁQBtK-niń 488-baby) jáne qylmystyq jaýaptylyq (QK-niń 179-baby (bilikti kúshtep basyp alýǵa shaqyrý), 405-baby (sot tyiym salǵan uiymdardyń qyzmetine qatysý)) kózdelgen.
"Quqyq qorǵaý organdary Qazaqstan Respýblikasynyń zańnamasyn buzatyn adamdarǵa zańda kózdelgen sharalardy qabyldaidy jáne kez kelgen quqyq buzýshylyqtardyń jolyn kesedi. Atap aitqanda, biyl 17 qarashada Ulttyq qaýipsizdik komitetiniń qyzmetkerleri prokýratýra organdarynyń yqpaldastyǵymen jeti adamnan turatyn qylmystyq top qyzmetiniń jolyn kesti. Olardyń bilikti kúshtep basyp alý maqsatynda qarý-jaraq pen tutandyrǵysh qospalardy paidalana otyryp, jappai tártipsizdikter men memlekettik jáne quqyq qorǵaý organdarynyń ǵimarattaryna, tirshilikti qamtamasyz etý obektilerine shabýyldar jasaýdy, olardyń qyzmetkerlerin óltirýdi josparlaýǵa, sondai-aq daiyndaýǵa qatystylyǵy týraly qujattyq dálelder alyndy", - delingen habarlamada.
Eske salaiyq, buǵan deiin sailaý kúni jappai tártipsizdik uiymdastyrǵysy kelgen qylmystyq top ustalǵany habarlanǵan bolatyn. Bul týraly Ulttyq qaýipsizdik komiteti ókilderi aitty.
