Kollaj: Orda.kz
Bas prokýrordyń orynbasary Jandos Ómiráliev Samat Ábishke qatysty eshqaida ketpeý týraly bultartpaý sharasy ózgermegenin málimdedi, dep habarlaidy Sputnik Qazaqstan.
"Bul qylmystyq is boiynsha bultartpaý sharasy ózgertilgen joq. Sol eshqaida ketpeý týraly bultartpaý sharasy óz kúshinde. Sebebi eshqandai da boi tasalaý nemese jaýap berýge kelmei jatyr degen faktiler joq", - dedi Ómiráliev Májilis kýlýarynda jýrnalister suraǵyna jaýap berip.
Jýrnalisterdiń "elden ketip qalady dep oilamaisyzdar ma?" degen suraǵyna:
"Tergeý organdarynda oǵan eshqandai negiz joq", - dep jaýap berdi Bas prokýrordyń orynbasary.
Aitýynsha, Samat Ábishtiń ústinen laýazymdyq ókilettigin asyra paidalaný boiynsha qylmystyq is qozǵalyp, tergeý júrip jatyr.
Biyl 19 qyrkúiekte Bas prokýratýra qańtar oqiǵasy boiynsha Ulttyq qaýipsizdik komiteti tóraǵasynyń burynǵy birinshi orynbasary Samat Ábishke qatysty tergeý bastalǵanyn habarlady. Ol "qańtar oqiǵasy" kezinde bilik pen laýazymdyq ókilettikterdi asyra paidalandy degen kúdikke ilingen.
Dál sol kúni Bas prokýratýra Samat Ábishten eshqaida ketpeý týraly qolhat alǵanyn, ol Qazaqstanda ekenin málimdedi.
Aita keteri, Samat Ábish – Tuńǵysh Prezident Nursultan Nazarbaevtyń nemere inisi. 2015 jyldan bastap qańtar oqiǵasyna deiin, iaǵni 2022 jyldyń qańtaryna deiin ulttyq qaýipsizdik komiteti tóraǵasynyń birinshi orynbasary qyzmetin atqarǵan.
Eske sala keteiik, qańtar oqiǵasynan keiin ulttyq qaýipsizdik komitetiniń burynǵy tóraǵasy Kárim Másimov pen onyń orynbasarlary ustaldy. Artynsha olarǵa sot úkimi shyqty. Másimovtiń múlki tárkilenip, ol 18 jylǵa bas bostandyǵynan aiyryldy. Al Másimovtiń orynbasary bolǵan Samat Ábish qyzmetinen bosatyldy, onyń ústinen qylmystyq is qozǵalǵan joq.
