Foto:ozen.kz
Bas prokýratýra "Ózenmunaigaz" AQ tenderleriniń zańdylyǵyn zerdeleidi, - dep habarlaidy "Ult aqparat" vedomstvonyń baspasóz qyzmetine silteme jasap.
Bas prokýrordyń tapsyrmasy boiynsha Mańǵystaý oblysyna ortalyq apparattyń tájiribeli qyzmetkerleri qatarynan qurylǵan jumys toby bardy.
"Jumys tobynyń aldynda «Ózenmunaigaz» AQ-da tenderlerdi ótkizý kezinde zańdylyqtyń saqtalýy jáne ashyqtyqtyń qamtamasyz etilýi máselelerin zerdeleý mindeti tur.
Merdiger uiymdardyń qyzmetkerleri bul máseleni jii kóterip, ony eńbek jaǵdailarynyń nasharlaýy jáne jalaqynyń tómendeýimen bailanystyratyny belgili.
Osyǵan bailanysty qadaǵalaý vedomstvosynyń qyzmetkerleri "Ózenmunaigaz" AQ-nyń qarjy-sharýashylyq qujattamasyn jáne satyp alýlaryn yqtimal zańbuzýshylyqtar men sybailas jemqorlyq táýekelderiniń bolýy turǵysynan taldaidy", - delingen habarlamada.
Sonymen qatar, Jańaózen qalasynyń jáne jalpy Mańǵystaý oblysynyń áleýmettik-ekonomikalyq damýyna taldaý júrgizilip jatyr. Taldaýmen injenerlik infraqurylym jáne turǵyn úi qurylysy, kásipkerlik, mádeniet, sport, týrizm jáne agroónerkásiptik keshendi damytý, densaýlyq saqtaý júiesin jetildirý salalaryndaǵy problemalyq máseleler, sondai-aq óńir úshin basqa da mańyzdy baǵyttar qamtylǵan.
Júrgizilgen jumystyń nátijeleri aldaǵy ýaqytta habarlanady.
