Parlament Májilisiniń jalpy otyrysynda «Halyq densaýlyǵy jáne densaýlyq saqtaý júiesi týraly» kodeksiniń jobasyn birinshi oqylymda talqylaý kezinde vaktsinatsiiany mindetti túrde engizý tyqyryby qaraldy, dep habarlaidy QazAqparat.
«Jalpy, zań jobasyna kóp kúsh salyndy, biraz sharýalar jasaldy, qoǵamǵa qajetti biraz nárseler qarailastyryldy. Biraq, 89 baptyń kóleminde qoǵam dúrgilip jatqanyn jasyrmaimyz. Men sailaýshylardyń amanatyn jetkize otyryp, osy 89 bapqa qarsy shyǵatynymdy jetkizgim keledi. Jumsaq kúsh, ilandyra túsindirý ádisimen kóndirýdiń ornyna, bas kóz joq «mindetti» dep, zańǵa qondyryp, tizege salýdyń qandai reti bar? Jalpy, osy vaktsinaǵa qarsy emespin. Balalaryma saldyramyn, ózim de kezinde vaktsina alǵanmyn. Biraq, kózi ashyq esi durys adamǵa túsindirse, túsinetin nárse ǵoi. Nege biz zańmen mindetteimiz? Bas prokýratýradan suraitynym, bas tartqan adam is júzinde zań buzýshy bolyp shyǵa kele me? Konstitýtsiianyń 29 babynda bar ǵoi, soǵan bul qaishy kelmei me? Ár adam óziniń densaýlyǵyn qorǵaýǵa quqyǵy bar. Maǵan túsindirińizdershi? Nege biz mindetteýimiz kerek?!», - dep surady depýtat Bekbolat Tileýhan.
Óz kezeginde, Densaýlyq saqtaý ministri Eljan Birtanov vaktsinatsiiany mindetti túrde engizý qadamy infektsiialyq aýrýlar boiynsha basqa azamattardyń densaýlyǵyn saqtaýǵa negizdelgenin aitty.
«Sebebi qazirgi kúnde osy ata-analardyń ekpeden bas tartýynyń saldarynan jalpy elimizde burynnan umytylǵan infektsiialyq aýrýlar qaityp kelip jatyr. Biraq odan tek qana sol balalar emes, basqa da kóptegen meditsinalyq aýrýlarǵa shaldyqqan balalar syrqattanýda. Sonymen, kóp memlekette keibir vaktsinalar mindetti túrde salynady. Atap aitqanda, basqa azamattardyń densaýlyǵyn saqtaý - ol Úkimettiń mindeti» - dedi ministr.
Sonymen qatar bul máselege qatysty Bas prokýrordyń orynbasary Marat Ahmetjanov ta túsinik berdi.
«Bekbolat Qanaiuly, bizdiń Konstitýtsiiamyz eki baptan turady, jalpy bap pen arnaiy bap. Bizdiń qundylyqtarymyz adam, adamnyń ómiri, adamnyń densaýlyǵy dep bizdiń negizgi zańymyzda kórsetilgen. Sondyqtan Konstitýtsiianyń jalpy bólimi arnaiy bólimnen bir saty joǵary turady. Eger adamnyń ómirine, densaýlyǵyna qaýip tónse, bizdiń Konstitýtsiia sol jerde zańmen shekteý jasaýǵa tolyq múmkindik berip otyr. Osy oraida Konstitýtsiiaǵa qaishy emes. Óitkeni, adamnyń ómiri eń qundy dep esepteledi. Bizdiń saraptamamyz boiynsha Konstitýtsiiaǵa bul normalar qaishy kelmeidi», - dedi M. Ahmetjanov.
Aita keteiik, atalǵan zań jobasy boiynsha qosymsha baiandama jasaǵan depýtat Záýresh Amanjolova infektsiialyq aýrýlarǵa qarsy vaktsinatsiia júrgizýdiń mindettiligi boiynsha norma qoldaý tapqanyn jetkizdi.
«Bul rette ekpeler mindetti jáne erikti bolyp aiqyndaldy. Sonymen qatar vaktsinanyń sapasyna qatań baqylaý normasy engizildi. Kez kelgen ýaqytta tekserýge múmkindik berilip, tekserýlerdiń arnaiy tizimine engizildi. Óndirýshiden bastap meditsina qyzmetkerlerine deiingi barlyq kezeńderde jaýapkershilik aitarlyqtai kúsheitiledi», - dedi Z. Amanjolova.
