Jambyl oblysy Qordai aýdanyndaǵy etnikalyq janjaldan keiin bes adam ustaldy, - dep habarlady bas prokýrordyń orynbasary Bolat Dembaev.
"Qordaidaǵy oqiǵa boiynsha bes adam ustaldy. Buzaqylyq, qart adamdy uryp-soǵý jáne politseige baǵynbaý isi boiynsha ustalǵan. Bul aqparat quraldarynda keńinen qamtyldy. Órteý, adam óltirý faktileri boiynsha tergeý jalǵasyp jatyr. Ázirge eshkim ustalǵan joq. Sebebi onda material kóp" dedi Dembaev 11 naýryzda.
Onyń aitýynsha "barlyq videomaterialdar zerttelgennen keiin sheshim qabyldanady".
7 aqpan keshke Jambyl oblysy Qordai aýdanynda qazaqtar men dúngender janjaldasyp, resmi derek boiynsha, 10 adam qaza taýyp, 180-nen asa adam zardap shekken. Keiin janjal bolǵan Masanchi aýylynda qiraǵan ǵimarattan taǵy bir adamnyń múrdesi tabylyp, politsiia onyń janjaldan qaza bolǵanyn rastady.
Qordaidaǵy janjal kezinde Qyrǵyzstanmen shekaraǵa jaqyn ornalasqan, negizinen etnikalyq dúngender turatyn Masanchi, Sortóbe, Aýqatty aýyldarynda, resmi málimet boiynsha, 20 saýda orny men 39 úi búlinip, 47 kólik órtendi. Úkimet qaqtyǵysta qiraǵan úiler men saýda oryndaryn qalpyna keltirýge kómektesetinin málimdegen.
Bilik janjal qart er adamnyń jaralanýymen aiaqtalǵan jol ústindegi kikiljińnen shyqqan dep málimdedi. Kikiljińnen soń qazaqtar (kóbi – Qarakemer aýylynyń turǵyny) jinalyp, dúngender turatyn aýyldarǵa barǵan.
Qazaqstan úkimeti janjalǵa bailanysty 120-dan astam qylmystyq is qozǵalǵanyn málimdedi. ("Adam óltirý" baby boiynsha 11 is). Qordaidaǵy janjaldan soń Jambyl oblysynyń ákimi Asqar Myrzahmetov bastaǵan birneshe sheneýnik jáne politsiia departamentiniń basshysy qyzmetten ketti. Onyń ornyna sol kezde premer-ministrdiń orynbasary bolǵan Berdibek Saparbaev taǵaiyndaldy.
1 naýryzda Qordai aýdanyna barǵan prezident Qasym-Jomart Toqaev zańsyz kontrabandamen ainalysqan eki qylmystyq toptyń arasyndaǵy teketiresten janjal shyqqanyn, sonyń kesirinen 11 adam qaza bolǵanyn aityp, jergilikti bilikke para alý men shekara arqyly zańsyz saýda jasaý máselelerin sheshýdi tapsyrdy.
