QR Bas prokýratýrasy Arnaiy prokýrorlary qyzmetiniń basshysy Rizabek Ojarov Qordai oqiǵasy boiynsha júrgizilip jatqan qylmystyq tergep-tekserý jumystary týraly baiandady, dep habarlaidy QazAqparat.
«Osy jyldyń 7-8 aqpanynda Qordai aýdanynyń úsh aýylynda 2 myńnan astam adamnyń qatysýymen jappai tártipsizdikter boldy. Sonyń saldarynan 11 adam qaza boldy, onyń 10-y óltirilgen. Bir adamnyń máiiti órtengen saýda úiiniń arasynan tabyldy. 140 adam men 20 politsiia qyzmetkeri túrli jaraqat aldy. 164 turǵyn úi men saýda nysany, 100-den astam avtomashina búlindi. 342 adam jábirlenýshi dep tanyldy. 400-den astam túrli sot saraptamalary jasaldy. Myń jarymnan astam adamnan jaýap alyndy», - dedi Rizabek Ojarov Ortalyq kommýnikatsiialar qyzmetinde ótken onlain baspasóz máslihatynda.
Spiker tártipsizdikterdi bastaýshylardyń jáne olarǵa qatysqandardyń janjaldasqan eki taraptan da bolǵanyn atap ótti. Qylmystyq jaýapqa 59 adam tartylyp jatyr, olardyń arasynda túrli ult ókilderi, sonyń ishinde qazaqtar men dúngender bar.
Memleket basshysy Qasym-Jomart Toqaevtyń tapsyrmasymen Qordai oqiǵasy boiynsha Qylmystyq isterdi tergep-tekserý erekshe baqylaýǵa alyndy. Osy maqsatta Bas prokýror arnaiy prokýrordyń basshylyǵymen vedomstvoaralyq tergeý tobyn qurdy.
«Biz adam óltirý, jappai tártipsizdikterge qatysý, politsiia qyzmetkeriniń ómirine qol suǵýshylyq, urlyq, tonaý, qaraqshylyq jáne múlikti joiý faktileri boiynsha 29 qylmystyq isti tergep-tekserip jatyrmyz. Kúsh qoldanǵan jáne Masanshy, Bulan batyr, Aýqatty aýyldary turǵyndarynyń múlkin qiratýǵa, órteýge, buzýǵa qatysqandardyń negizgi bóligi – jastar, jumyssyzdar. Olardyń arasynda adam óltirý, qaraqshylyq, buzaqylyq, tonaý, zorlaý úshin sotty bolǵandar da bar. Tártipsizdik barysynda qylmystar densaýlyq pen azamattardyń múlkine barynsha ziian keltirý úshin atys qarýyn, «Molotov kokteili» dep atalatyn jandyrǵysh qospalaryn, tastar men ózge de qolda bar quraldardy paidalaný arqyly jasalǵan», - dedi ol.
Al kúdiktilerdiń oqiǵaǵa qatystylyǵy kýálardyń aiǵaqtarymen, eldimekenderde ornalasqan beinekameralarmen, uialfy telefonǵa túsirilgen qolda bar beinejazbalar arqyly rastaldy. Jappai tártipsizdikterge qatysqany anyqtalǵan árbir kúdiktiń áreketine is boiynsha jinalǵan barlyq aiǵaqqa muqiiat taldaý jasaǵannan keiin baǵa berildi. Bostandyqta júrgen 12 kúdikti adamǵa jeke kepilgerlik túrindegi bultartpaý sharasy tańdalǵan.
«Kinásin moiyndaǵandary, tergeýge kómekteskender, qylmys jasaýdaǵy ekinshi deńgeidegi rólde bolǵandar otbasylyq jáne densaýlyq jaǵdailary eskerile otyryp 8 adam qamaýdan bosatyldy. Kúzet qoiylǵan adamdardyń quqyqtaryn iske asyrý maqsatynda Karantin jaǵdaiynda barlyq qamaýdaǵylarǵa týystarymen beinebailanys arqyly sóilesýge múmkindik berildi. Vedomstvoaralyq tergeý toby istiń mán-jaiyn tolyq obektivti, jan-jaqty zertteýdi qamtamasyz etý boiynsha jumysty jalǵastyrýda. Basqa aqparat Qylmystyq-protsestik kodekstiń 201-babyna sáikes jariialaýǵa jatpaidy», - dedi spiker.
Sonymen birge, Arnaiy prokýrorlary qyzmetiniń basshysy kúdiktilerdiń zań aldynda birdei ekenin aityp, turǵyndarǵa úndeý jasady.
«Qurmetti azamattar! Sońǵy kezderi ártúrli adamdar tarapynan júrgizilip otyrǵan tergeý-tekserýdiń obektivti emestigi jáne aǵattyqpen júrgizilgeni týraly rastalmaǵan aqparat aitylyp júr. Tergeý úshin barlyq kúdikti ultyna qaramastan, Qazaqstan Respýblikasynyń azamattary bolyp sanalatynyn erekshe atap ótkim keledi. Bizdiń negizgi zańymyz – Konstitýtsiia ultyna bailanysty qandai da bir kemsitýge tyiym salady. Tergep-tekserý barysynda tek qana Qylmystyq protsestiń zańnamalyq normalaryn basshylyqqa alamyz. Barlyq kúdiktiler bilikti zańgerlik kómekpen qamtamasyz etilgen. Olar qatysatyn árbir tergeý is-qimyly advokattyń kóz aldynda ótedi. Vedomstvoaralyq jedel tergeý toby músheleriniń quqyqqa syiymsyz áreketteri týraly barlyq habarlamalar men ótinishter muqiiat tekseriledi. Qazirgi ýaqytta olardyń áreketterinen qandai da bir zańbuzýshylyqtar anyqtalǵan joq. Azamattardy shynaiy emes málimetti taratpaýǵa jáne tek qana resmi aqparatqa senýge shaqyramyn», - dedi Rizabek Ojarov.
Eske sala ketsek, 7 aqpan kúni Jambyl oblysy Qordai aýdanyndaǵy Masanshy aýylynyń turǵyndary arasynda jappai tóbeles boldy.
