Áleýmettik jelilerde 24 jáne 25 qazanda ortalyq alańdarda jergilikti atqarýshy organdarmen kelisilgen mitingilerge qatysý týraly jalǵan habarlamalar men arandatýshylyq úndeýler taralyp jatyr. Bul aqparat shyndyqqa sáikes kelmeidi, - dep habarlady Bas prokýratýranyń baspasóz qyzmeti.
"Bul kúnderi osy jerlerde qandai da bir mitingiler ótkizý kelisilgen joq. "Respýblika kúnin" merekeleýdi eskere otyryp, tek resmi mádeni-buqaralyq is-sharalar ótkiziletin bolady. Osyǵan bailanysty jalǵan habarlamalarmen jariialanǵan aktsiialardy uiymdastyrý jáne olarǵa qatysý, sondai-aq, olarǵa shaqyrý zańsyz.
Ókinishke qarai, mitingilerdi nemese ózge de beibit jinalysty ótkizýdiń zańdy tártibin birneshe ret túsindirýge qaramastan, ony buzý oryn alyp jatyr. Bul tártip 2020 jylǵy 25 mamyrda qabyldanǵan "Qazaqstan Respýblikasynda beibit jinalystardy uiymdastyrý jáne ótkizý tártibi týraly" Zańmen reglamenttelgenine nazar aýdaramyz", - delingen habarlamada.
Zań talaptaryn buza otyryp, ótkiziletin mitingilerdi, sherýlerdi, jinalystardy nemese demonstratsiialardy uiymdastyrý jáne olarǵa qatysý (3 - baptyń 3-tarmaǵy) zańsyz jáne Ákimshilik quqyqbuzýshylyq týraly kodekstiń 488-baby boiynsha 25 táýlikke deiin qamaqqa alý kózdelgen.
Mysaly, 15 qazanda Almaty qalasynda zańsyz mitingke qatysýǵa shaqyrǵan osyndai úndeýler úshin A. esimdi er adamǵa sot Ákimshilik quqyqbuzýshylyq týraly kodekstiń 488-baby 7-bóligi boiynsha 15 táýlikke qamaqqa alý túrinde ákimshilik jaza qoldandy. Osyndai quqyqbuzýshylyq úshin biyl 12 qazanda Almaty oblysynda D. er adam 15 táýlikke qamaqqa alyndy.
"Zańdylyqty, qoǵamdyq qaýipsizdikti qamtamasyz etý, quqyqbuzýshylyqtyń aldyn alý, adam men azamattyń quqyqtary men bostandyqtaryn qorǵaý maqsatynda qoldanystaǵy zańnama normalaryn múltiksiz saqtaýǵa, arandatýshylyqqa berilmeýge jáne zańsyz aktsiialardy, olarǵa jariia shaqyrýlardy uiymdastyrýdan jáne olarǵa qatysýdan bas tartýǵa shaqyramyz", - delingen habarlamada.
