© Sputnik / Tabyldy Kadyrbekov
Bas prokýratýra "1 mamyrda 6 qalada miting ótkizýge kelisim berildi" degen aqparatqa qatysty málimdeme jasap, onyń jalǵan ekenin eskertti, dep habarlaidy "Ult aqparat".
"Áleýmettik jelilerde jekelegen adamdar Nur-Sultan, Almaty, Shymkent, Aqtóbe, Aqtaý jáne Jańaózen qalalarynyń ákimdikteri 1 mamyrda Ýkrainadaǵy áskeri is-qimyldarǵa qatysty mitingiler ótkizýge kelisim bergen dep jalǵan habarlamalar taratyp jatyr. Atalǵan aqparat shyndyqqa sáikes kelmeidi", - deidi Bas prokýrordyń orynbasary Bolat Dembaev Úndeýinde.
Bul kúni ákimdikter eldi mekenderdiń ortalyq alańdarynda "Qazaqstan halqynyń birligi kúnin" merekeleýge arnalǵan mádeni-buqaralyq is-sharalardy ǵana ótkizýdi josparlap otyr.
"Budan basqa, mitingilerdi uiymdastyrý jáne ótkizý tártibi 2020 jylǵy 25 mamyrda qabyldanǵan «Qazaqstan Respýblikasynda beibit jinalystardy uiymdastyrý jáne ótkizý tártibi týraly» Zańmenretteletinine nazar aýdaramyz.
Jinalystardy, mitingiler men piketterdi uiymdastyrý jáne ótkizý úshin habarlama jasaý tártibi kózdelgen.
Alaida uiymdastyrýshylar jergilikti atqarýshy organdarǵa joǵaryda atalǵan qalalarda beibit jinalystardy uiymdastyrý jáne ótkizý týraly tiisti habarlamalar bermegen ne olar boiynsha kelisýden bas tartylǵan.
Tiisinshe, zańdy (3-baptyń 3-tarmaǵy) buza otyryp júrgizilgen mitingilerdi uiymdastyrý jáne olarǵa qatysý quqyqqa qaishy bolyp tabylady jáne Ákimshilik quqyq buzýshylyq týraly kodekstiń 488-baby boiynsha 25 táýlikke qamaqqa alýǵa deiin ákimshilik jaýaptylyqqa ákep soǵady", - dedi ol.
Eger bul áreketter azamattardyń, uiymdardyń, qoǵamnyń nemese memlekettiń quqyqtary men zańdy múddelerine eleýli ziian keltirýmen qatar júretin bolsa, Qylmystyq kodekstiń 400-baby boiynsha qylmystyq jaýaptylyq týyndaityny, ol 200 AEK-ke deiingi mólsherde aiyppul ne túzeý jumystary nemese 200 saǵatqa deiingi merzimge qoǵamdyq jumystarǵa tartý ne 50 táýlikke deiingi merzimge qamaqqa alý túrindegi jazany kózdeitini eskertildi.
"Bas prokýratýra azamattardy qoldanystaǵy zańnama normalaryn múltiksiz saqtaýǵa, arandatýshylyqqa boi aldyrmaýǵa jáne zańsyz aktsiialarǵa qatysýdan bas tartýǵa shaqyrady.
Quqyq qorǵaý organdary belgilengen tártipke, qoǵamdyq qaýipsizdikke qol suǵatyn kez kelgen quqyq buzýshylyqtyń jolyn kesedi, sondai-aq olarǵa jol bermeý boiynsha zańda kózdelgen sharalardy qabyldaidy", - dedi Dembaev.
