Elimizde balalarǵa qatysty jasalatyn qylmys sany 8 paiyzǵa ósti. Bul týraly QR Bas prokýrorynyń orynbasary Marat Ahmetjanov aitty, dep habarlaidy "Ult aqparat".
«Biyl balalarǵa qatysty jasalatyn qylmystardyń sany 8 paiyzǵa ósip otyr. Onyń ózindik sebebi de bar. Máselen, bir adamǵa qatysty 18 jasqa tolmaǵan jábirlenýshilerge qatysty qylmys jasaǵany úshin 60 qylmystyq is qozǵalǵan bolatyn. Bul da qylmys sanynyń artýyna túrtki bolyp otyr. Sonymen qatar, biz ótken jyly dárigerlerge jáne jabyq mekemelerdegi, internattardaǵy jynystyq sipattaǵy faktilerdi jasyrǵandarǵa qylmystyq jaýapkershilik engizdik», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, bul da balalarǵa qatysty jasalatyn statistikanyń artýyna sebep sanalady.
«Sondyqtan da 8 paiyz ósim boldy. Munyń barlyǵy - epizodtar. Biraq zardap shegýshilerdiń sany artqan joq. Aldaǵy ýaqytta da pedofiliiamen kúres jumystary kúsheitiletin bolady», - dedi Marat Ahmetjanov.
