Bas prokýratýra Qytaida ómir boiy bas bostandyǵynan aiyrylǵan Aqjarqyn Turlybaidy elge qaitarý úshin ne isteý kerektigin túsindirdi, dep habarlaidy Sputnik Qazaqstan.
Bas prokýrordyń orynbasary Marat Ahmetjanovtyń aitýynsha, prokýratýra organdary úkimniń zańdy kúshine engenin kútedi. Odan keiin Aqjarqyn Turlybaidy jazany óz elinde óteý úshin qaitarý sharalaryna kirisýge bolady. Alaida oǵan Turlybaidyń óz kelisimi kerek.
"Qazaqstan men Qytaidyń arasynda tiisti kelisimshart bar. Sol shart boiynsha jumys isteimiz. Sot úkimi shyqqanymen zańdy kúshine enýi kerek. Sodan keiin ókiletti organ – prokýratýra, iaǵni biz qalǵan jazasyn Qazaqstanda óteýge múmkindik jasaimyz. Kelisimsharttyń negizinde suraý salamyz. Árine, Aqjarqynnyń óz kelisimi bolýy kerek. Qazaqstanda qalǵan jazany óteýge kelisip, ótinish berse, jumys isteimiz", - dedi Ahmetjanov.
Sot úkimi ózgerissiz qaldy
27 jeltoqsanda Qytai soty otandasymyz Aqjarqyn Turlybaiǵa qatysty sot sheshimin ózgerissiz qaldyrǵan bolatyn.
"Qytai soty ómir boiy bas bostandyǵynan aiyrý týraly úkimdi ózgerissiz qaldyrdy", - delingen syrtqy ister ministrliginiń resmi habarlamasynda.
Sot úkimi 10 kúnnen soń kúshine enedi. Otyrysqa Aqjarqynnyń advokattary men Qazaqstannyń Qytaidaǵy elshiliginiń konsýly qatysqan.
Aqjarqyn Turlybaidyń taǵdyry
Qazaqstan azamaty Aqjarqyn Turlybai 2014 jyly naýryzda Gýanchjoý áýejaiynda ustalǵan bolatyn. Oǵan shekaradan 4,5 keli esirtkini alyp ótpek boldy degen aiyp taǵyldy. Ol kezde otandasymyz 20 jasta bolǵan edi.
2015 jyldyń maýsymynda Qytai soty ony ómir boiyna bas bostandyǵynan aiyrdy. Sotta Aqjarqyn sheteldik dosy aldap ketkenin aityp, kinásin moiyndaǵan joq.
2016 jyly sot sheshimi joiylyp, is qaita qaraýǵa jiberildi.
